ഇടുക്കി: മൂന്നാറിനു സമീപം ആനച്ചാലില്‍ പ്രവര്‍ത്തിച്ചിരുന്ന സ്‌കൈ ഡൈനിംഗിന് സ്റ്റോപ്പ് മെമ്മോ നല്‍കി ജില്ലാ കളക്ടര്‍. റെസ്റ്റോറന്റ് ലൈസന്‍സില്ലാതെയാണ് സ്ഥാപനം നടത്തിയിരുന്നതെന്ന് ബോധ്യമായതോടെ നടത്തിപ്പുകാര്‍ക്കെതിരെ കേസെടുക്കുകയും ചെയ്തു. ഈ ആകാശ ഭക്ഷണ ശാലയില്‍ വിനോദസഞ്ചാരികള്‍ കുടുങ്ങിയ സംഭവത്തെത്തുടര്‍ന്നാണ് നടപടികള്‍.കേരള അഡ്വഞ്ചര്‍ ടൂറിസം പ്രമോഷന്‍ കൗണ്‍സിലിന്റെ മാത്രം അനുമതിയാണ് സ്‌കൈ ഡൈനിംഗിന് ഉണ്ടായിരുന്നത്.
അതേസമയം സ്‌കൈ ഡൈനിംഗ് എന്ന ആശയത്തിന് ഏതൊക്കെ അനുമതി വേണമെന്ന കാര്യത്തില്‍ വ്യക്തമായ ചട്ടമില്ലെന്ന് ചൂണ്ടിക്കാണിക്കപ്പെടുന്നു. എങ്കിലും അപകടത്തിന്‌റെ പശ്ചാത്തലത്തില്‍ ജില്ലാ കളക്ടറുടെ പ്രത്യേകഅധികാരം ഉപയോഗിച്ച് സ്റ്റോപ്പ് മെമ്മോ നല്‍കുകയായിരുന്നു.
സമാന സ്വഭാവമുള്ള സാഹസിക പ്രവര്‍ത്തനങ്ങളില്‍ ഏര്‍പ്പെട്ടിട്ടുളള സ്ഥാപനങ്ങളില്‍ പരിശോധന നടത്താനും ജില്ല കളക്ടര്‍ നിര്‍ദേശിച്ചിട്ടുണ്ട്.