മലപ്പുറം: യൂത്ത് ലീഗ് പ്രവർത്തകനായിരുന്ന ഓട്ടോ ഡ്രൈവർ ഒതായി മനാഫ് കൊലക്കേസിൽ മുൻ എംഎൽഎ പി.വി അൻവറിന്റെ സഹോദരീ പുത്രൻ മാലങ്ങാടൻ ഷഫീഖിന് ജീവപര്യന്തം തടവും, ഒരു ലക്ഷം രൂപ പിഴയും ശിക്ഷ. മഞ്ചേരി അഡീഷണൽ ജില്ലാ സെഷൻസ് കോടതിയാണ് ശിക്ഷ വിധിച്ചത്. കേസിലെ മറ്റ് പ്രതികളെ വെറുതേ വിട്ടിരുന്നു. ഷഫീഖ് കുറ്റക്കരനാണെന്നും കൊലക്കുറ്റം നിലനിൽക്കുമെന്നും കഴിഞ്ഞ ദിവസം കോടതി ഉത്തരവിട്ടിരുന്നു.

1995 ഏപ്രില്‍ 13നാണ് ഓട്ടോറിക്ഷ ഡ്രൈവറായിരുന്ന മനാഫിനെ ഒതായി അങ്ങാടിയില്‍ വച്ച് അടിച്ചും കുത്തിയും കൊലപ്പെടുത്തിയത്. നേരത്തെ കേസിൽ 21 പ്രതികളെ കുറ്റവിമുക്തരാക്കിയിരുന്നു. ഇന്നലെ മൂന്ന് പ്രതികളെ കൂടി വെറുതേ വിട്ടിരുന്നു. 25 വര്‍ഷം ഒളിവിലായിരുന്നു ഷഫീബ്. മനാഫിന്റെ സഹോദരന്‍ അബ്ദുല്‍ റസാഖ് നടത്തിയ നിയമ പോരാട്ടത്തിനൊടുവിലാണ് പ്രതികൾ പിടിയിലായത്.

കേസിൽ രണ്ടാം പ്രതിയായ പി.വി. അൻവർ അടക്കമുള്ള പ്രതികളെയാണ് നേരത്തെ കോടതി വെറുതെ വിട്ടത്.