മലപ്പുറം: നിലമ്പൂര്‍ എടക്കരയില്‍ കാലില്‍ കെട്ടിവെച്ച് എംഡിഎംഎ അടക്കമുള്ള ലഹരി വസ്തുക്കള്‍ കടത്തിയ യുവതിയെയും ഒപ്പമുണ്ടായിരുന്ന യുവാവിനെയും പോലീസ് പിടികൂടി. കോഴിക്കോട് സ്വദേശികളായ സുബീന, ഷെഫീഖ് എന്നിവരാണ് പിടിയിലായത്. ചുരിദാറിനടിയില്‍ സുബിനയുടെ കാലില്‍ കെട്ടിവച്ച നിലയില്‍ 74.6 ഗ്രാം ഹാഷിഷ് ഓയിലും 39.6ഗ്രാം എംഡിഎംഎയും ജില്ലാ പോലീസ് മേധാവിയുടെ കീഴിലുള്ള ഡാന്‍സാഫ് സംഘം പിടിച്ചെടുത്തു. നര്‍ക്കോട്ടിക് സെല്‍ ഡിവൈഎസ്പി സിബി, നാര്‍ക്കോട്ടിക് സെല്‍ എസ് ഐ കെ ആര്‍ ജസ്റ്റിന്‍ എന്നിവരുടെ നേതൃത്വത്തിലായിരുന്നു പ്രതികളെ പിടികൂടിയത്.