ഗുവാഹത്തി ; അസം മുഖ്യമന്ത്രി ഹിമന്ത ബിശ്വ ശർമ്മയ്ക്കും , പൊലീസുകാർക്കുമെതിരെ വിവാദപ്രസ്താവന നടത്തിയ എ.ഐ.യു.ഡി.എഫിലെ മുൻ എം.എൽ.എ.യായ അലി അക്ബർ മിയാൻ അറസ്റ്റിൽ. ബക്രീദ് സമയത്തെ ബലി തടയാൻ പൊലീസുകാർ എത്തിയാൽ വരുന്ന പൊലീസുകാരും “ബലിയർപ്പിക്കപ്പെടും” എന്നായിരുന്നു മിയാന്റെ ഭീഷണി . ഇതിന്റെ വീഡിയോ പുറത്ത് വന്നതിനു പിന്നാലെയായിരുന്നു അറസ്റ്റ് .
വീഡിയോയിൽ, മുഖ്യമന്ത്രി ഹിമന്ത ബിശ്വ ശർമ്മയെയും മിയാൻ കുറ്റപ്പെടുത്തുന്നുണ്ട്. വീഡിയോ വൈറലായതിനെത്തുടർന്ന്, അസമിലെ ധുബ്രി പോലീസ് ബിലാസിപാര പോലീസ് വിവിധ വകുപ്പുകൾ പ്രകാരം കേസ് രജിസ്റ്റർ ചെയ്തു . ഏകദേശം രണ്ട് മണിക്കൂർ നീണ്ട ചോദ്യം ചെയ്യലിന് ശേഷമാണ് അദ്ദേഹത്തെ അറസ്റ്റ് ചെയ്തത്.
മുഖ്യമന്ത്രിയെ പരാമർശിക്കുമ്പോൾ മിയാൻ ആക്ഷേപകരമായ ഭാഷയും ഉപയോഗിച്ചു. അത്തരം പ്രസ്താവനകൾ സാമൂഹിക സംഘർഷം സൃഷ്ടിക്കുന്നതിനും നിയമലംഘനത്തിനും സാധ്യതയുണ്ടെന്ന് പോലീസ് പറഞ്ഞു. അതേസമയം, ഹിമന്ത ബിശ്വ ശർമ്മ സമാധാനവും സാമുദായിക ഐക്യവും നിലനിർത്താൻ അഭ്യർത്ഥിക്കുകയും ഈദ് കമ്മിറ്റികൾ സമാധാനപരമായി ബക്രീദ് ആഘോഷിക്കണമെന്ന് ആവശ്യപ്പെടുകയും ചെയ്തു.
തർക്കങ്ങൾ ഒഴിവാക്കുന്നതിനായി നിരവധി ഈദ്ഗാഹ് കമ്മിറ്റികളും പ്രാദേശിക സംഘടനകളും പശുക്കളെയും എരുമകളെയും ബലിയർപ്പിക്കുന്നതിൽ നിന്ന് വിട്ടുനിൽക്കുമെന്ന് സ്വമേധയാ പ്രഖ്യാപിച്ചിട്ടുണ്ട്.