വയനാട് : ഷിഗല്ല രോഗ വ്യാപനത്തില് ആശങ്ക വേണ്ടെന്ന് ആരോഗ്യ മന്ത്രി കെ മുരളീധരന്. രോഗത്തിന്റെ ഉറവിടം കണ്ടെത്താനായിട്ടില്ല.
തിളപ്പിച്ചാറിയ വെള്ളം നല്കാത്ത ഹോട്ടലുകള്ക്കെതിരെ നടപടിയെടുക്കുമെന്ന് മന്ത്രി പറഞ്ഞു. ബത്തേരി താലൂക്ക് ആശുപത്രിയില് സ്ഥിതിഗതികള് വിലയിരുത്തിയ ശേഷമായിരുന്നു പ്രതികരണം.
ഷിഗല്ല ബാധിച്ച് വിവിധ ആശുപത്രികളില് ചികിത്സയില് കഴിയുന്ന കുട്ടികളുടെ എണ്ണം 38 ആയി. കോളിയാടി എയുപി സ്കൂളിലെ കിണറിലെ വെള്ളത്തിന്റെ പരിശോധന ഫലം ബുധനാഴ്ച വരും. തദ്ദേശ സ്വയംഭരണ സ്ഥാപനങ്ങള് പരിസരം വൃത്തിയാക്കുന്ന കാര്യങ്ങള് വേഗത്തില് ആക്കണമെന്ന് കെ മുരളീധരന് നിര്ദേശിച്ചു. ഹോട്ടലുകളിലും തട്ടുകടകളിലും കര്ശന പരിശോധന നടത്തും. രോഗനിയന്ത്രണത്തിന് എല്ലാ വകുപ്പുകളും ഏകോപിപ്പിച്ചുള്ള പ്രവര്ത്തനങ്ങള് നടക്കണം.
കഴിഞ്ഞ ദിവസങ്ങളിലായി രോഗലക്ഷണങ്ങളുമായി ചികിത്സ തേടിയത് 443 വിദ്യാര്ത്ഥികളാണ് . രോഗം സ്ഥിരീകരിച്ച രണ്ടു കുട്ടികളുടെ ആരോഗ്യനില തൃപ്തികരമാണ്. ആശുപത്രി വിട്ട കുട്ടികളും മാര് ബസേലിയോസ് എ യു പി സ്കൂളിലെ മുഴുവന് കുട്ടികളും നിരീക്ഷണത്തിലാണ്. ചികിത്സയിലുള്ള 68 കുട്ടികളില് 26 പേരും ബത്തേരി താലൂക്ക് ആശുപത്രിയിലാണുളളത്.