டிக்டாக் மற்றும் மெட்டா நிறுவனங்களில் ஒரு ஊழியராக இருந்து கொண்டே இது போன்ற மாற்றங்களைச் செய்வது மிகவும் கடினமாக இருந்தது என்று ஆண்ட்ரூ காங் கூறினார்.

“தங்கள் தயாரிப்புகளை விளம்பரப்படுத்துவதில் ஆர்வமுள்ள ஒரு தனியார் நிறுவனத்திடம் சென்று அவர்களின் செயல்பாடுகளை கட்டுப்படுத்திக் கொள்ளுமாறு கூறுவது என்பது பசியுடன் இருக்கும் புலியின் கூண்டுக்குள் சென்று என்னை சாப்பிட வேண்டாம் என்று கேட்பது போன்றது” என்று அவர் கூறுகிறார்.

குழந்தைகள் மற்றும் பதின்வயதினர்கள் ஸ்மார்ட்போன்களைப் பயன்படுத்துவதை நிறுத்திக்கொண்டால் அவர்களின் வாழ்க்கை சிறப்பாக இருக்கும் என்றும் அவர் கூறுகிறார்.

ஆனால் காயை பொறுத்தவரை, பதின்ம வயதினரை ஸ்மார்ட்போன்கள் அல்லது சமூக ஊடகங்கள் பயன்படுத்துவதை நிறுத்த சொல்வது என்பது இதற்கு தீர்வாகாது.

ஃபோன், அவரது வாழ்க்கையின் ஒருங்கிணைந்த பகுதியாகும். நண்பர்களுடன் உரையாடுவது, வெளியில் செல்லும்போது வழிகாட்டுவதற்கும், பொருட்களை வாங்க பணம் செலுத்துவதற்கும் ஃபோன் முக்கியமாக பயன்படுகிறது.

மாறாக, பதின்வயது பயனர்கள் பார்க்க விரும்பாதவற்றை சமூக ஊடக நிறுவனங்கள் கருத்தில் கொள்ள வேண்டும் என்று அவர் விரும்புகிறார். பயனர்களின் விருப்பத்தேர்வுகளுக்கு ஏற்ப உள்ளடக்கங்களை பரிந்துரைக்கும் தொழில்நுட்ப அமைப்புகளை உருவாக்க வேண்டும் என்று அவர் விரும்புகிறார்.

“சமூக ஊடக நிறுவனங்கள் பணம் ஈட்டும் நோக்கத்திலே செயல்படுகின்றனர். பயனர்களின் கருத்துகளுக்கு அவர்கள் மதிப்பு கொடுக்கவில்லை என்று நான் உணர்கிறேன்”, என்று காய் கூறுகிறார்.

“தீங்கு விளைவிக்கும் உள்ளடக்கங்கள் பெரும்பாலும் குறைந்த அளவிலே சிறுவயதான பயனர்களுக்கு பரிந்துரைக்கப்படுகிறது. அது போன்ற பதிவுகள் அவர்களுக்கு பரிந்துரைக்கப்பட்டால், அதை பார்ப்பதில் இருந்து பயனர்களை தடுக்க முடியாததாகிவிடும் என்பதை நாங்கள் அறிவோம்” என்கிறார் ஆஃப்காமின் ஆன்லைன் பாதுகாப்பு கொள்கை மேம்பாட்டு இயக்குனர் அல்முதேனா லாரா

இதற்காக தகவல் தொடர்பு துறை நிறுவனங்களுக்கு அபராதம் விதிக்கலாம் மற்றும் தொடர்ந்து வீதி மீறினால் குற்றவியல் வழக்குகளை கூட அவர்கள் மீது பதிவு செய்யலாம் என்று ஆஃப்காம் கூறுகிறது. ஆனால் பிரிட்டனில் இந்த நடவடிக்கைகள் 2025 ஆம் ஆண்டு வரை நடைமுறைபடுத்தப்படாது.

இந்த துறையிலே முன்னணியில் இருக்கும் புதுமையான தொழில்நுட்பத்தை பயன்படுத்துவதாக டிக்டாக் நிறுவனம் கூறியுள்ளது.

மேலும் பதின்ம வயது பயனர்களுக்கு பாதுகாப்பான, மற்றும் அவர்களுக்கு வன்முறை போன்ற தீங்கு விளைவிக்கும் பொருத்தமற்ற உள்ளடக்கத்தை பரிந்துரைப்பதை தடுக்கும் வசதிகள் இந்த அமைப்பில் உள்ளதாக அந்நிறுவனம் தெரிவித்துள்ளது.

பதின்ம வயது பயனர்களுக்கு அவர்களது வயதிற்கு ஏற்ப உள்ளடக்கங்களை பரிந்துரைக்க 50-க்கும் மேற்பட்ட தொழில்நுட்ப அமைப்புகள் இருப்பதாக இன்ஸ்டாகிராம் மற்றும் பேஸ்புக்கை நிர்வகிக்கும் மெட்டா நிறுவனம் கூறியுள்ளது. தனது செயலிகளின் செயல்பாடுகளில் இருந்தே கருத்துக்களை பெற்று அதற்கான தீர்வு காண நிறுவனத்தின் கொள்கைகளை மாற்ற வலுவான செயல்முறைகளை மேற்கொள்வதாக அந்நிறுவனம் தெரிவித்தது.

– இது, பிபிசிக்காக கலெக்டிவ் நியூஸ்ரூம் வெளியீடு.