கடந்த ஜூன் மாதம், சென்னையில் நடந்த காங்கிரஸ் பொதுக்குழுக் கூட்டத்தில் பேசிய தமிழக காங்கிரஸ் தலைவர் செல்வப்பெருந்தகை, “திமுகவை காங்கிரஸ் ஆதரிக்கிறது. ஆனால் தோழமை என்பது வேறு, சார்ந்திருத்தல் என்பது வேறு. எத்தனை நாட்களுக்கு நாம் சார்ந்திருக்கப் போகிறோம்?” என்று குறிப்பிட்டார்.

மக்களவைத் தேர்தலில், தமிழ்நாட்டில் திமுக தலைமையிலான கூட்டணியில் 9 தொகுதிகளில் போட்டியிட்ட காங்கிரஸ் கட்சி, அனைத்திலும் வென்ற நிலையில், அதன் தமிழக தலைவர் செல்வப்பெருந்தகை அவ்வாறு பேசியது பல்வேறு விவாதங்களைக் கிளப்பியது.

அப்போது அதுகுறித்து பிபிசி தமிழிடம் பேசிய செல்வப்பெருந்தகை, “நான் கட்சியை வலிமைப்படுத்த வேண்டும் என்ற நோக்கில் தான் பேசினேன். திமுகவை எதிர்க்க வேண்டும் என்ற நோக்கத்திலோ அல்லது கூட்டணியை விட்டு வெளியேற வேண்டும் என்ற நோக்கத்திலோ பேசவில்லை” என்று தெரிவித்திருந்தார்.

திமுகவின் மற்றொரு முக்கிய கூட்டணிக் கட்சியான விடுதலைச் சிறுத்தைகளும் சமீப காலமாக திமுகவுடன் சில விஷயங்களில் முரண்படுவதைக் காண முடிந்தது.

கள்ளக்குறிச்சி விஷ சாராய மரணங்கள் தொடர்பாக எதிர்கட்சிகள் பல்வேறு போராட்டங்களை முன்னெடுத்தன, ஆனால் கூட்டணி கட்சியான விடுதலைச் சிறுத்தைகளும் ஆர்ப்பாட்டத்தை முன்னெடுத்தது.

“ தமிழ்நாட்டில் கள்ளச்சாராயத்தை தடுப்பதாகக் கூறியே 2003ஆம் ஆண்டு அதிமுக காலத்தில் டாஸ்மாக் திறக்கப்பட்டது. அப்போது 3 ஆயிரம் கோடிக்கு விற்பனையானது, தற்போது 45ஆயிரம் கோடிக்கு விற்பனையாகிறது” என்று மது விற்பனை அதிகரித்திருப்பதை குறிப்பிட்டு அந்த ஆர்ப்பாட்டத்தில் பேசினார் திருமாவளவன்.

அதே சமயத்தில், ‘தி.மு.க எதிர்ப்பு’ என்ற மனநிலையில் இருந்து கள்ளக்குறிச்சி விவகாரத்தை அணுகக் கூடாது என்றும் அவர் கூறினார்.

கடந்த ஜுலை மாதம், சென்னையில், பகுஜன் சமாஜ் கட்சியின் மாநிலத் தலைவர் ஆம்ஸ்ட்ராங் படுகொலை செய்யப்பட்டார். இதனைத் தொடர்ந்து எதிர்க் கட்சிகள் திமுக ஆட்சியின் மீதும், காவல்துறையின் நடவடிக்கை தொடர்பாகவும் விமர்சனத்தை முன்வைத்தன.

விடுதலைச் சிறுத்தைகள் கட்சியும் விமர்சனங்களை முன்வைத்தது. கொலையில் ஈடுபட்ட குற்றவாளிகளை சில மணி நேரங்களில் கைது செய்துவிட்டோம் என்று காவல்துறை தெரிவித்த போது, “கைது செய்யப்பட்டவர்கள் உண்மையான குற்றவாளிகள் இல்லை” என்று திருமாவளவன் ஊடகங்களிடம் தெரிவித்தார்.

“இது போன்ற கொலைகள் தொடர்ந்து நடப்பது அதிர்ச்சி அளிக்கிறது. குறிப்பாக தலித் தலைவர்கள், சிறிய அளவில் இருந்தாலும், பாதுகாப்பற்ற நிலையில் இருக்கிறார்கள் என்பதை இது உணர்த்துகிறது” என்று திருமாவளவன் பேசினார்.

சில நாட்களுக்கு முன்பாக புதுச்சேரியில் செய்தியாளர்களைச் சந்தித்த திருமாவளவன், “திமுக கூட்டணியில் விரிசல் ஏற்படாதா என நினைப்பவர்கள் வதந்தி பரப்புகின்றனர். கட்சியின் கொள்கை, உரிமை தொடர்பாக எழுப்பும் குரல் வேறு, கூட்டணி தொடர்பாக கொண்டுள்ள நிலைப்பாடு என்பது வேறு. எனவே வதந்திகள் எங்கள் கூட்டணியைப் பாதிக்காது” என்று கூறினார்.

சமீபத்தில் இந்து சமய அறநிலையத்துறை சார்பில் நடத்தப்பட்ட அனைத்துலக முத்தமிழ் முருகன் மாநாட்டுக்கு திமுக கூட்டணியில் உள்ள மார்க்சிஸ்ட் கம்யூனிஸ்ட் கட்சி எதிர்ப்பை தெரிவித்தது.

அக்கட்சியின் மாநிலச் செயலாளர் கே.பாலகிருஷ்ணன் மத அடிப்படையிலான விழாக்களை அரசு நடத்துவதை தவிர்க்க வேண்டும் என்று கூறினார்.