ஆகஸ்ட் 31ம் தேதி அன்று முதன்முறையாக இந்த விவகாரம் குறித்து பொதுவெளியில் பேசிய அவர், “எங்கும் ஓடிவிடவில்லை,” என்று செய்தியாளர்கள் சந்திப்பில் பேசினார்.

“தனிப்பட்ட வாழ்விலும், திரை வாழ்விலும் சில முக்கிய விவகாரங்களில் ஈடுபடுத்திக் கொண்டதால் இது குறித்து பேச இயலவில்லை” என்று கூறிய அவர், அறிக்கையில் குறிப்பிட்டிருப்பது போன்று அனைத்தையும் தங்களின் கட்டுக்குள் வைத்திருக்கும் அதிகாரக் குழு எதுவும் இல்லை என்றும் தெரிவித்தார்.

“மற்ற துறைகளில் நடப்பதைப் போன்றே திரைத்துறையிலும் நடக்கிறது. ஹேமா கமிட்டியின் அறிக்கையை நான் வரவேற்கின்றேன். அந்த கமிட்டி உறுப்பினர்கள் முன்பு ஆஜரான நான் அவர்களின் அனைத்து கேள்விகளுக்கும் பதில் கூறினேன். மொத்த திரைத்துறையும் இந்த அறிக்கைக்கு பதில் கூற வேண்டும். ஆனால் அம்மாவையோ (கேரள நடிகர் சங்கம்) தனி நபர்களையோ நடந்த அனைத்திற்கும் காரணமாக கூறக் கூடாது. அறிக்கை வெளியான பிறகு அனைத்துவிதமான விமர்சனங்களும் நேரடியாக அம்மா மீதே வைக்கப்பட்டது. அதனால் தான் வழக்கறிஞர்களிடம் பேசி, நடிகர் சங்கத்தின் செயற்குழுவை கலைக்கும் முடிவுக்கு வந்தோம்,” என்று செய்தியாளர்களிடம் குறிப்பிட்டார் நடிகர் மோகன்லால்.

“அறிக்கை வரவேற்கத்தக்கதுதான். ஆனால் எங்களால் என்ன செய்திருக்க இயலும்? இது மலையாள திரையுலகை முழுமையாக அழித்துவிடும். ஆயிரக்கணக்கான மக்கள் இங்கே பணியாற்றுகின்றனர். நான் மெட்ராஸில் (சென்னை) என்னுடைய திரைத்துறை பயணத்தை ஆரம்பித்த போது, எந்த விதமான வசதிகளும் இல்லை. மலையாள திரையுலகம் மிகச்சிறியது. எங்களின் கடின உழைப்பால் இதனை கட்டி எழுப்பினோம்,” என்று கூறினார்.

கமிட்டி குறித்து எழுப்பிய பல்வேறு கேள்விகளுக்கு அவரின் பதில், “அதற்கு நான் என்ன செய்ய முடியும்?” என்ற பதிலையே அவர் முன்வைத்தாதார்.