‘துணை முதலமைச்சர்’ என்ற பதவிக்கு சிறப்பு அதிகாரங்கள் உள்ளனவா என்பதைத் தெரிந்துகொள்ளும் முன், ‘துணை பிரதமர்’ என்ற பதவி குறித்தும் தெரிந்துகொள்ள வேண்டும்.

சர்தார் வல்லபாய் பட்டேல், மொரார்ஜி தேசாய், எல்.கே. அத்வானி உள்ளிட்ட சில தலைவர்கள் இந்தியாவின் துணை பிரதமர்களாக பதவி வகித்து உள்ளனர்.

1989ஆம் ஆண்டு, பிரதமர் வி.பி.சிங் அமைச்சரவையில் தேவிலால் துணை பிரதமராக பதவி வகித்தார்.

அதற்கு முன்னதாக வல்லபாய் பட்டேல், மொரார்ஜி தேசாய் போன்ற தலைவர்கள் துணை பிரதமராக பதவி வகித்திருந்தும் கூட தேவிலாலின் பதவியேற்பை எதிர்த்து உச்சநீதிமன்றத்தில் வழக்கு தொடரப்பட்டது.

இந்த வழக்கில் 1990ஆம் ஆண்டு தீர்ப்பளித்த உச்சநீதிமன்றம், “துணை பிரதமர் என்பவர் மத்திய அமைச்சரவையின் ஒரு அமைச்சர் மட்டுமே. பிரதமர் பதவிக்கான எந்த அதிகாரமும் ‘துணை பிரதமர்’ பதவிக்கு வழங்கப்படவில்லை.” என்று கூறியது.

இதன் மூலம், துணை பிரதமர், துணை முதலமைச்சர் ஆகிய பதவிகளுக்கு அரசியலமைப்பு சட்டத்தின்படி எந்தவித சிறப்பு அதிகாரங்களும் இல்லை என்பதை உச்சநீதிமன்றம் தெளிவுபடுத்தியுள்ளது.

“துணை முதலமைச்சர் பதவிக்கு என பிரத்யேக அதிகாரங்கள் அரசியலமைப்பில் வழங்கப்படவில்லை தான், ஆனால் அதிகாரப் பகிர்வு என்ற அடிப்படையில் முதலமைச்சருக்கு அடுத்த இடத்தில் அவர் இருப்பார். முதலமைச்சரின் உத்தரவின் பேரில், அவரது பணிகளையும் கூட துணை முதலமைச்சர் மேற்கொள்ளலாம்” என்று பிபிசி தமிழிடம் கூறினார் வழக்கறிஞரும், திமுகவின் நாடாளுமன்ற உறுப்பினருமான வில்சன்.

“அதேபோல எந்தெந்த துறைகள் துணை முதலமைச்சருக்கு ஒதுக்கப்படுகின்றன என்பதும் முக்கியம். தமிழ்நாட்டின் நிர்வாகத்தை அடுத்தக்கட்டத்திற்கு கொண்டு செல்ல, தமிழ்நாட்டின் வளர்ச்சியைக் கருத்தில் கொண்டே உதயநிதி ஸ்டாலினை துணை முதலமைச்சராக்கும் முடிவு எடுக்கப்பட்டுள்ளது.” என்று கூறுகிறார் வில்சன்.

தமிழ்நாட்டின் மூன்றாவது துணை முதலமைச்சராக இன்று பதவியேற்க உள்ளார் உதயநிதி ஸ்டாலின். முதன்முதலில் 2009ஆம் ஆண்டு திமுக ஆட்சியின் போது, மு.க.ஸ்டாலின் துணை முதலமைச்சராகப் பொறுப்பேற்றார்.

பிறகு 2017இல், அதிமுக ஆட்சியில் முதலமைச்சர் எடப்பாடி பழனிசாமி தலைமையிலான அமைச்சரவையில் துணை முதலமைச்சராக ஓ.பன்னீர்செல்வம் பதவி வகித்தார்.