உலகில் பல தீவுகள் எரிமலை வெடிப்புகளால் உருவாகியுள்ளன.

எடுத்துக்காட்டாக, எரிமலை தீவுகளின் ஒரு நேர்கோட்டு சங்கிலிதான் ஹவாய் தீவுகள். இவை சுமார் 70 மில்லியன் ஆண்டுகளுக்கு முன்பு உருவாகத் தொடங்கியதாக நிபுணர்கள் கருதுகின்றனர்.

கடலுக்கு அடியில் உள்ள மாக்மா மேல்நோக்கி உயர்ந்து, கடல் மட்டத்திற்கு மேல் தோன்றியதால் இவை உருவாகியதாக நிபுணர்கள் நம்புகின்றனர்.

சாண்டோரினி தீவு, ஏஜியன் கடலில் கிமு 1630-ல் ஒரு பெரிய பண்டைய எரிமலை வெடிப்பால் உருவானது என்று தேசிய கடல் மற்றும் வளிமண்டல நிர்வாகம் (NOAA) கூறுகிறது.

ஐஸ்லாந்து உள்ளிட்ட பிற இடங்களும் எரிமலை நடவடிக்கைகளால் உருவாகியவைதான்.

“உலகில் எரிமலைத் தீவுகளை காணக்கூடிய பல இடங்கள் உள்ளன. நீங்கள் செல்லக்கூடிய இடங்களில் எங்காவது மணல் கருப்பாக இருந்தால், அது பெரும்பாலும் எரிமலை மண்ணாக இருக்கலாம்”என்கிறார் இயோ.

நீருக்கடியில் உள்ள எரிமலைகள் தொடர்ந்து புதிய நிலப்பகுதிகளை உருவாக்குகின்றன.

உதாரணமாக, 2023-ல் ஜப்பானுக்கு அருகிலுள்ள இவோட்டோ தீவின் கடற்கரையில் ஒரு நீருக்கடியில் எரிமலை வெடித்து, புதிய தீவு ஒன்றை உருவாக்கியது.

ஆனால், சில சமயங்களில் இந்த புதிய தீவுகள் அரிக்கப்பட்டு தண்ணீருக்கு அடியில் மறைந்துவிடுகின்றன.

“நாம் அதிக தீவுகள் உருவாகியிருப்பதைக் காணலாம், ஆனால் சில தீவுகள் மறைவதையும் காணலாம்” என்கிறார் ஐசோபெல் யோ.

நீருக்கடியில் உள்ள எரிமலைகளை கண்காணிப்பது கடல் சூழலை நன்கு புரிந்துகொள்ள முக்கியம் என்று பேராசிரியர் கெல்லி வலியுறுத்துகிறார்.

“இந்த எரிமலைகள் கடற்பரப்பில் சோலைகளைப் போல உள்ளன. இவற்றுடன் நம்பமுடியாத உயிரியல் சமூகங்கள் உள்ளன. பாறைகளைப் பார்க்க முடியாத அளவுக்கு அங்கு பல விலங்குகள் உள்ளன”என்றும் அவர் கூறுகிறார்.

நீருக்கடியில் உள்ள சூழல்களைப் பற்றிய கூடுதல் தகவல்கள், ஆழ்கடல் சுரங்கம் போன்ற செயல்பாடுகளில், பொறுப்பான முடிவுகளை எடுக்க உதவும் என்கிறார் பேராசிரியர் கெல்லி.

“அங்கு என்ன வகையான உயிரினங்கள் உள்ளன, அவை கடலின் மற்ற பகுதிகளை எவ்வாறு பாதிக்கின்றன, அவை எவ்வளவு காலம் நீடிக்கும் என்பதை புரிந்துகொள்ள வேண்டும். சுரங்கம் செய்வதற்கு முன் இந்தத் தகவல்கள் தேவை,” என்று அவர் விளக்குகிறார்.

நிலத்தில் இருக்கும் எரிமலைகளோ அல்லது நீருக்கடியில் இருக்கும் எரிமலைகளோ, அனைத்தும் அச்சுறுத்தலை ஏற்படுத்தக்கூடும் என்று இயோ கூறுகிறார்.

“நீருக்கடியில் உள்ள எரிமலைகளைப் பற்றி, மற்ற எரிமலைகளை விட அதிகமாக கவலைப்பட வேண்டியதில்லை என நான் நினைக்கிறேன்,” என்று கூறும் அவர்,

“ஆனால், அவற்றை நிலத்தில் உள்ளவற்றைப் போலவே கண்காணிக்க வேண்டும். ஆனால், நாம் அதனைச் செய்யவில்லை” என்பதையும் குறிப்பிடுகிறார்.

ஏப்ரல் மாதத்தில், ஐஸ்லாந்தில் நிலத்தில் உள்ள எரிமலை வெடித்ததால், சுற்றுலாப் பயணிகளும், அங்கு குடியிருந்தவர்களும் வெளியேற்றப்பட்டனர்.

எனவே, “நீருக்கடியில் உள்ள எரிமலைகளிலும் இவ்வாறு நடக்க வாய்ப்பிருக்க வேண்டும் என நான் நினைக்கிறேன்,” என்கிறார் முனைவர் யோ.

நீருக்கடியில் உள்ள எரிமலைகளை கண்காணிப்பது முக்கியம், ஏனெனில் அவை ஏற்படுத்தும் ஆபத்துகள் வெடிப்புகளுடன் மட்டும் இணைக்கப்படவில்லை. எரிமலையின் பகுதிகள் நீருக்கடியில் உடைந்து, சுனாமியை உருவாக்கக்கூடும் என்று அவர் கூறுகிறார்.

பேராசிரியர் டெப் கெல்லி, ஆக்சியல் சீமவுண்ட் எரிமலையின் கண்காணிப்பில் ஈடுபட்டுள்ளார். இந்த எரிமலை பசிபிக் பெருங்கடலில் சுமார் 2,600 மீட்டர் (8,500 அடி) ஆழத்தில் உள்ளது.

இந்த எரிமலை 311 மைல் (500 கிமீ) நீளமுள்ள கேபிள் மூலம் கண்காணிக்கப்படுகிறது.

இந்த கேபிள் கரையிலிருந்து எரிமலைக்கு நேரடியாகச் செல்கிறது என்றும் அவர் குறிப்பிடுகிறார்.

இதன் மூலம், விஞ்ஞானிகள் எரிமலை வெப்பமடைவதையும், அதன் முந்தைய வெடிப்புகளின் புள்ளிகளை விட அதிகமாக இருப்பதையும் கவனித்துள்ளனர், என்கிறார் பேராசிரியர் கெல்லி.

இது அடுத்த ஒரு வருடத்தில் வெடிக்கலாம். ஆனால், கடலின் அழுத்தம் உள்ளிட்ட பல காரணங்களால் இது நிலத்தில் உணரப்படாது என்று கூறும் அவர்,

புதிய தொழில்நுட்பம் எதிர்காலத்தில் நீருக்கடியில் உள்ள எரிமலை அமைப்பை சிறப்பாகக் கண்காணிக்க உதவும் என்றும் கருதுகிறார்.

“இது நமது பூமியின் மிக முக்கியமான பகுதி. இதைப் பற்றி நாம் மேலும் தெரிந்துகொள்ள வேண்டும்,” என்று வலியுறுத்துகிறார் பேராசிரியர் கெல்லி .

– இது, பிபிசிக்காக கலெக்டிவ் நியூஸ்ரூம் வெளியீடு