எர்துவான் பல ஆண்டுகளாக ஐநா பொதுச் சபையில் காஷ்மீர் பிரச்னையை எழுப்பி வருகிறார். ஆனால் கடந்த சில ஆண்டுகளாக இந்த விவகாரத்தில் ஒருவித மென்போக்கையே கடைப்பிடித்து வந்தார்.

​​எர்துவான் கடந்த ஆண்டு, ஐநா பொதுச் சபையில் உரையாற்றியபோது, காஷ்மீர் பற்றிக் குறிப்பிட்டு, “இந்தியா மற்றும் பாகிஸ்தான் இடையிலான ஒத்துழைப்பு மற்றும் பேச்சுவார்த்தை காரணமாக காஷ்மீரில் அமைதி நிலை உருவானால், அது தெற்காசியாவில் அமைதி, ஸ்திரத்தன்மை மற்றும் செழிப்புக்கு வழிவகுக்கும்” என்று கூறியிருந்தார்.

ஐக்கிய நாடுகள் சபையின் 77வது பொதுச் சபையில் (2022) உரையாற்றிய எர்துவான், “75 ஆண்டுகளுக்கு முன்பு, இந்தியாவும் பாகிஸ்தானும் தனித்த அரசியல் அதிகாரம் கொண்ட இரண்டு நாடுகளாக மாறின. ஆனால் இரு நாடுகளுக்கும் இடையே அமைதியும் ஒற்றுமையும் நிறுவப்படவில்லை. இது மிகவும் துரதிர்ஷ்டவசமானது. காஷ்மீரில் அமைதி நிலைநாட்டப்படும் என்று நாங்கள் நம்புகிறோம், பிரார்த்தனை செய்கிறோம்” என்று கூறினார்.

ஆகஸ்ட் 5, 2019 அன்று, அரசியலமைப்பின் 370வது பிரிவின் கீழ் ஜம்மு காஷ்மீருக்கு வழங்கப்பட்ட சிறப்பு அந்தஸ்தை இந்திய அரசு ரத்து செய்தது.

அன்று முதல் எர்துவான் காஷ்மீர் பிரச்னையை உலக அரங்கில் எழுப்பி வருகிறார். இதனால் இரு நாடுகளுக்கும் இடையிலான உறவில் பதற்றம் ஏற்பட்டுள்ளது.

காஷ்மீர் குறித்து எர்துவானின் முந்தைய அறிக்கைகளுக்கு பதிலளிக்கும் விதமாக, இது முற்றிலும் ஏற்றுக்கொள்ள முடியாதது என்று இந்தியா கூறி வருகிறது. துருக்கி, மற்ற நாடுகளின் இறையாண்மைக்கு மதிப்பளிக்க வேண்டும் என்று இந்தியா கூறியிருந்தது.

“ஜம்மு காஷ்மீர் முழுவதும் மற்ற பகுதிகளில் இருந்து துண்டிக்கப்பட்டு இருப்பதாக” 2019இல் எர்துவான் கூறியிருந்தார். 2020இல் “காஷ்மீர் என்பது பற்றி எரியும் ஒரு பிரச்னை” என்றும், “370ஐ நீக்கியது இந்தப் பிரச்னையை மேலும் சிக்கலாக்கியுள்ளது” என்றும் அவர் கூறினார்.

அதுவே 2021இல், “ஐக்கிய நாடுகள் சபையின் தீர்மானத்தின்படி காஷ்மீர் பிரச்னைக்குத் தீர்வு காணப்பட வேண்டும்” என கருத்து தெரிவித்தார்.

அதன் பிறகு 2022இல், “காஷ்மீர் பிரச்னை- இந்தியாவுக்கும் பாகிஸ்தானுக்கும் இடையிலான இருதரப்பு விவகாரம்” என்று விவரிக்கத் தொடங்கினார் எர்துவான்.

காஷ்மீர் தொடர்பான எர்துவானின் நிலைப்பாடு குறித்து, 2022ஆம் ஆண்டில், ‘தி ப்ரூக்கிங்ஸ் இன்ஸ்டிடியூஷனின்’ மூத்த உறுப்பினர் தன்வி மதன் பின்வரும் கருத்தைத் தெரிவித்திருந்தார்.

“உண்மையில், கடந்த சில ஆண்டுகளாக காஷ்மீர் விவகாரத்தில் ஒருவித மென்போக்கையே எர்துவான் கடைப்பிடித்து வருகிறார். இது தவிர, பாகிஸ்தான் பிரதமருடனான செய்தியாளர் சந்திப்பில் காஷ்மீர் பிரச்னைக்கு ஐக்கிய நாடுகள் சபையின் தீர்மானங்களின்படி தீர்வு காணப்பட வேண்டும் என்றும் எர்துவான் கூறியிருந்தார்.”