நாடியம்மன் கோவிலில் ஆண்டுதோறும் மார்ச் – ஏப்ரல் மாதங்களில் திருவிழா நடத்தப்படுவது வழக்கம். கடந்த ஆண்டு ஏப்ரல் 2ஆம் தேதியன்று நாடியம்மன் கோவில் திருவிழா நடத்தப்பட்டது.

இதற்கான அழைப்பிதழை இந்து சமய அறநிலையத்துறை அச்சடித்துள்ளது. அதில், திருவிழா விவரங்கள் என்ற தலைப்பில் தினசரி நடக்கும் நிகழ்வுகளைப் பட்டியலிட்டுள்ளனர். அதற்குப் பக்கத்தில் குறிப்பிட்ட நாளின் விழாவை நடத்தும் மண்டகப்படிதாரர் யார் என்ற விவரம் இடம் பெற்றுள்ளது.

முதல் நாள் விழா தொடர்பான விவரத்தில், ‘ஊரார் – ராஜுக்கள், நாயுடு வகையறா’ எனக் குறிப்பிடப்பட்டுள்ளது.

“இதில், ஊரார் என்பது பட்டுக்கோட்டை மற்றும் அதைச் சுற்றியுள்ள பட்டியல் சாதி மக்களைக் குறிக்கும் சொல்” எனக் கூறுகிறார், நீதிமன்றத்தில் வழக்கு தொடர்ந்த கே.பி.செல்வராஜ். இவர் நடுவிக்கோட்டை ஆதிதிராவிடர் நல சங்கத்தின் தலைவராக இருக்கிறார்.

பட்டுக்கோட்டை நகரம் மற்றும் அங்கிருந்து 8 கி.மீ தொலைவில் உள்ள நடுவிக்கோட்டை கிராமத்தில் வசிக்கும் பட்டியல் சாதி மக்கள், தங்களின் முக்கியக் கடவுளாக நாடியம்மனை பார்க்கின்றனர்.

உயர்நீதிமன்ற மதுரைக் கிளையில் கே.பி.செல்வராஜ் தொடர்ந்த வழக்கின் முக்கிய அம்சமாக, மாற்று சாதியினரை அடையாளப்படுத்துவது போல, ஆதிதிராவிடர்களையும் அழைப்பிதழில் குறிப்பிட வேண்டும் என்பதைத் தனது கோரிக்கையாக முன்வைத்திருந்தார்.

வழக்கு விசாரணையின்போது, அறநிலையத்துறையின் செயல் அலுவலர் பதில் மனுவைத் தாக்கல் செய்தார். அதில், “கிருஷ்ண தேவராயர் ஆட்சிக்காலத்திலேயே இங்கு ராஜுக்களும் நாயுடு சமூகத்தினரும் வந்துவிட்டனர். அவர்கள்தான் கோவிலுக்கு நன்கொடை தருகின்றனர்” எனக் கூறியுள்ளார்.

“கோவிலில் உள்ள வழக்கத்தை உடனே எடுத்துவிட முடியாது” எனக் கூறிய அவர், “அழைப்பிதழில் ஆதிதிராவிடர்களைச் சேர்த்தால் மற்ற சாதியினரும் தங்கள் பெயரையும் சேர்க்குமாறு உள்ளே வந்துவிடுவார்கள். இதில் பாகுபாடு காட்டப்படுவதாகக் கூறப்படுவதில் உண்மை இல்லை” என்று வாதிட்டார்.

அதேநேரம், கோவிலில் நன்கொடையாளர்கள் பட்டியலில் மாற்று சாதியினர் பெயர்கள் உள்ளதாகவும் கோவில் விழாக் குழுவில் அவர்கள் கிடையாது எனவும் அறநிலையத்துறை செயல் அலுவலர் கூறியுள்ளார்.