அமைப்புகளின் சார்பில் பலரும் கருத்துத் தெரிவிக்க தயங்கும் நிலையில், இதே அமைப்புகளில் உறுப்பினர்களாக உள்ள பல்வேறு கட்டுமான நிறுவனத்தினரிடமும் பிபிசி தமிழ் பேசியது. அவர்களில் பலரும் வெவ்வேறு பகுதிகளில் மாஸ்டர் பிளான் வரைவுக்கும், தற்போது நடைமுறைப்படுத்தப்பட்டுள்ள இறுதி மாஸ்டர் பிளானுக்கும் இடையில் நிலப் பயன்பாட்டிலுள்ள மாற்றங்களைப் பட்டியலிட்டனர். அவை சார்ந்த சில ஆதாரங்களையும் பிபிசி தமிழிடம் பகிர்ந்தனர்.

உதாரணமாக, கோவை மாநகராட்சிக்குட்பட்ட வீரகேரளம், வடவள்ளி, காளப்பட்டி, துடியலுார் உள்ளிட்ட சில பகுதிகளில் மாஸ்டர் பிளான் வரைவில் குடியிருப்பு என்று காட்டப்பட்டிருந்த பல சர்வே எண்கள், இறுதி செய்யப்பட்ட மாஸ்டர் பிளானில் உத்தேச விவசாயப்பகுதி (Proposed Agriculture Land) என்று மாறியுள்ளன. இன்னும் சில பகுதிகள், தரிசு நிலப் பகுதிகள் (Dry Land) என்று குறிப்பிடப்பட்டுள்ளன.

பெயர் குறிப்பிட விரும்பாத ஒரு கட்டுமான நிறுவனத்தின் நிர்வாகி, ”வரும் 2041 ஆம் ஆண்டு வளர்ச்சியை கணக்கிட்டு மாஸ்டர் பிளான் தயாரிக்கப்பட்டதாகச் சொல்லியிருக்கிறார்கள். ஆனால் 20 ஆண்டுகளுக்கு முன்பே குடியிருப்பாக மாறிய பகுதியை இப்போது விவசாயப் பகுதியாக மாற்றியிருக்கிறார்கள். கள ஆய்வே செய்யாமல் ஜிபிஎஸ் உதவியுடன், அதிக மரங்கள் உள்ள பகுதிகளை எல்லாம் விவசாயப் பகுதி என்று தீர்மானித்துள்ளனர். எங்கள் பகுதியில் மட்டும் 300 ஏக்கரை இப்படி மாற்றியுள்ளனர்.” என்றார்.

ஏற்கெனவே மனைப் பிரிவாக பிரிக்கப்பட்டு, வீடுகள் கட்டப்பட்டுள்ள பல பகுதிகளை விவசாய ப்பகுதி என்று மாற்றியிருப்பதையும் வரைபடத்துடன் கட்டுமான நிறுவனத்தினர் சுட்டிக்காட்டினர். இதனால் நில உபயோக மாற்றத்துக்காக மீண்டும் ஒவ்வொரு துறையிலும் தடையின்மைச் சான்று வாங்கி, சென்னைக்கு சென்று திட்ட அனுமதி வாங்க வேண்டிய நிர்ப்பந்தத்தை உருவாக்கியுள்ளதாக அவர்கள் குற்றம்சாட்டுகின்றனர்.

இதுவரை திட்டம் அல்லாத பகுதியாக இருந்த (Non Planning Area) காரமடை, பெரியநாயக்கன்பாளையம் தாலுகா பகுதிகளில் 2 ஆயிரம் ஏக்கர் நிலங்களை திட்டப்பகுதியாக மாற்றிவிட்டதால், அங்கு நில உபயோக மாற்றத்துக்காக சென்னைக்கு கோப்புகளை எடுத்துக்கொண்டு அலைய வேண்டியிருக்கும் என்கிறார் கட்டடப் பொறியாளர் கணேஷ். இதனால் ஏராளமான கட்டுமானத் திட்டங்கள் தேக்கமடையும் என்று கூறும் அவர், இதை 2041 வரை மாற்ற முடியுமா என்பதும் சந்தேகமாகவுள்ளதாக தெரிவிக்கிறார்.

விவசாயிகள் மற்றும் கட்டுமானத்துறையினரின் புகார்கள் குறித்து, தமிழக நகர ஊரமைப்பு இயக்குநர் கணேசனிடம் பல்வேறு கேள்விகளை பிபிசி தமிழ் முன்வைத்தது. அதற்கு பதிலளித்த அவர், ”முன்பிருந்த உள்ளூர் திட்டக்குழுமப் பகுதியில் 60 சதவிகிதமாக இருந்த விவசாயப் பகுதி, இந்த மாஸ்டர் பிளானில் 30 சதவிகிதமாகக் குறைக்கப்பட்டுள்ளது. இதற்கு மேலும் குறைத்தால் விவசாயப் பகுதியே இருக்காது.” என்றார்.

”மாஸ்டர் பிளான் வரைவில் இருந்ததை அப்படியே ஏற்க வேண்டியதில்லை. குடியிருப்பாக மாற்றப்பட்ட பல பகுதிகள், மனைப் பிரிவாக மேம்படுத்தப்படாததால் மாற்றப்பட்டிருக்கலாம். இது துறை அதிகாரிகள் மட்டும் தயாரித்ததில்லை. பல்வேறு துறை நிபுணர்கள், அரசுத்துறைகள், ஆலோசனை நிறுவனங்கள் என 30க்கும் மேற்பட்டோரால் பல கட்டங்களில் பரிசீலிக்கப்பட்டு இறுதி வடிவம் கொடுக்கப்பட்டுள்ளது. இது 5 ஆண்டுகளுக்கு ஒரு முறை மறுஆய்வு செய்யப்படும்.” என்றார் கணேசன்.

நிலப் பயன்பாடு மாற்றத்தால் கட்டுமானத்துறையினர், நில உபயோக மாற்றத்துக்காக மீண்டும் கோப்புகளை துாக்கிக்கொண்டு சென்னை செல்ல வேண்டிய கட்டாயமும், அலைச்சலும், செலவும் ஏற்படும் என்று அச்சப்படுவது குறித்து அவரிடம் கேட்டபோது, ”நிலப் பயன்பாட்டை மாற்றுமாறு முன்மொழிவு (Proposal) அனுப்பினால் அதை மறு வகைப்பாடு (reclassification) செய்வதற்கு வாய்ப்புள்ளது. அது மட்டுமின்றி மறுவகைப்பாடு முன்மொழிவு வழிமுறைகளை மிகவும் எளிமைப்படுத்தப் போகிறோம்.” என்றார்.

“மாஸ்டர் பிளான் என்பது கட்டுமானத்துறையினர் மட்டும் பயன் பெறுவதற்காக வடிவமைக்கப்பட்டதில்லை. அதில் ஒருங்கிணைந்த வளர்ச்சி, தொலைநோக்குடன் கூடிய மேம்பாடு என பல விஷயங்களும் கருத்தில் கொள்ளப்பட்டு உருவாக்கப்பட்டுள்ளது” என்று கூறிய அவரிடம், மறுபுறத்தில் விவசாயப்பகுதிகளையும் திட்டச்சாலையாக மாற்ற விவசாயிகள் எதிர்ப்புத் தெரிவிப்பது குறித்தும் பிபிசி தமிழ் கேள்வி எழுப்பியது.

அதற்கு பதிலளித்த அவர், ”அதுவும் நகர ஊரமைப்புத் துறை முன்மொழிந்த திட்டமில்லை. மாநில நெடுஞ்சாலைத் துறையால் பரிந்துரைக்கப்பட்டதுதான். போக்குவரத்து மற்றும் சாலைக் கட்டமைப்புகள் குறித்து ஓர் ஆலோசனை நிறுவனம் கொடுத்த ஆலோசனைப்படியே அந்த திட்டச்சாலை வடிவமைக்கப்பட்டுள்ளது. மாஸ்டர் பிளானில் எதையும் உடனே மாற்ற முடியாது.” என்றார்.

– இது, பிபிசிக்காக கலெக்டிவ் நியூஸ்ரூம் வெளியீடு