புதிய விசாவை பெற வேலை வாய்ப்புகளை உருவாக்கும் தேவை குறித்து டிரம்ப் எதையும் குறிப்பிடவில்லை. “அது பணக்காரர்களுக்கானதாக இருக்கும்,” என்றார் அவர்.

ஈபி-5 விசாக்களின் எண்ணிக்கை வரம்பிடப்பட்டுள்ள நிலையில், பற்றாக்குறையை குறைக்க 10 மில்லியன் “கோல்டு கார்டுகளை” அரசு விற்கலாம் என்றார் டிரம்ப்,

இது “மிகச்சிறப்பானதாக இருக்கலாம், ஒருவேளை அது அற்புதமாக இருக்கலாம்” என்றும் அவர் தெரிவித்தார்.

“இது பணக்காரர்கள் அல்லது மிகவும் திறமையான நபர்களுக்கான குடியுரிமைக்கான பாதையாகும். திறமையான நபர்கள் நாட்டிற்குள் நுழைவதற்கு பணக்காரர்கள் பணம் செலுத்துவார்கள். மேலும் நபர்கள் நாட்டிற்கு அழைத்த வரவும், அவர்கள் நாட்டில் நீண்ட காலம் தங்குவதற்கான அந்தஸ்தை பெறவும் நிறுவனங்கள் பணம் செலுத்தும்” என்று அவர் குறிப்பிட்டார்.

பணக்கார ரஷ்யர்கள் இதற்குத் தகுதி பெற முடியுமா என்று பத்திரிகையாளர்கள் கேட்டதற்கு, “ஆம், ஒருவேளை தகுதி பெறலாம். எனக்கு தலைசிறந்த சில ரஷ்யப் பணக்காரர்களைத் தெரியும், அவர்கள் மிகவும் நல்ல மனிதர்கள்” என்று டிரம்ப் பதிலளித்தார்.

இருப்பினும், அனைத்து விண்ணப்பதாரர்களும், “அற்புதமான, உலகத் தரம் வாய்ந்த உலகளாவிய குடிமக்கள்” என்பதை உறுதிப்படுத்த முழுமையான சோதனைக்கு உட்படுத்தப்படுவார்கள் என்று லுட்னிக் கூறினார்.

கோல்டன் விசா வைத்திருப்பவர்கள் குடியுரிமைக்காக எவ்வளவு காலம் காத்திருக்க வேண்டும் என்பதும் தெளிவாகத் தெரியவில்லை.

கிரீன் கார்ட் வைத்திருக்கும் தற்போதைய ஈபி-5 திட்டத்தில் பயனாளிகள், நிரந்தர குடியிருப்பாளராக ஐந்து ஆண்டுகள் அமெரிக்காவில் வசித்த பிறகே குடியுரிமைக்கு தகுதி பெற முடியும்.

அமெரிக்கக் குடியுரிமைக்கான தகுதிகளை நாடாளுமன்றம் தீர்மானிக்கிறது, ஆனால் “கோல்டு கார்டுகளுக்கு” நாடாளுமன்றத்தின் ஒப்புதல் தேவையில்லை என்று டிரம்ப் குறிப்பிட்டுள்ளார்.

மேலும் புதிய திட்டத்தின் விவரங்கள் இரண்டு வாரங்களில் வெளியிடப்படும் என்றும் அவர் கூறினார்.

“ஈபி-5 திட்டம்…அர்த்தமற்றது, கற்பனையால் நிரம்பியதும் மோசடிகளால் நிறைந்ததுமாக இருந்தது. குறைந்த விலையில் கிரீன் கார்ட் பெறுவதற்கான ஒரு வழியாக இது இருந்தது. எனவே இதுபோன்ற அபத்தமான ஈபி-5 திட்டத்தை வைத்திருப்பதைக் காட்டிலும், நாங்கள் ஈபி-5 திட்டத்தை முடிவுக்குக் கொண்டுவரப் போகிறோம் என்று அதிபர் கூறினார்” என்கிறார் லுட்னிக்

வெளிநாட்டு முதலீட்டை ஈர்ப்பதற்காக அமெரிக்க நாடாளுமன்றம் 1990ம் ஆண்டில் ஈபி-5 திட்டத்தை நிறுவியது. சுமார் 1 மில்லியன் டாலர் முதலீடு செய்து, குறைந்தபட்சம் 10 வேலைகளை உருவாக்குபவர்களுக்கு இந்த விசா வழங்கப்பட்டது.

இந்த திட்டத்தின் கீழ், முதலீட்டாளர்கள் தங்கள் முதலீட்டிற்கு ஈடாக உடனடியாக கிரீன் கார்டு பெறுகிறார்கள், இது எதிர்காலத்தில் குடியுரிமை பெறுவதற்கான ஒரு வழியாகும்.

ஆனால், கிரீன் கார்டு விண்ணப்பதாரர்கள் பெரும்பாலானோர், நிரந்தர குடியிருப்பாளர் அந்தஸ்தை பெற பல மாதங்கள் முதல் பல ஆண்டுகள் வரை காத்திருக்க வேண்டியுள்ளது.

ஈபி-5 திட்டமானது வருடத்திற்கு 10,000 விசாக்களுக்கு வரம்பிடப்பட்டுள்ளது, மேலும் வேலைவாய்ப்பின்மை அதிகம் உள்ள பகுதிகளில் முதலீடு செய்யும் முதலீட்டாளர்களுக்காக 3,000 விசாக்கள் ஒதுக்கப்பட்டுள்ளது என்று அமெரிக்க அரசு தெரிவித்துள்ளது.

பிற குடியேற்ற விசாக்களை விட ஈபி-5 விசாக்களால் மோசடி நடவடிக்கைகள் அதிகம் ஏற்படும் ஆபத்து உள்ளது என்று 2021ஆம் ஆண்டு அமெரிக்க நாடாளுமன்ற ஆராய்ச்சி சேவையின் அறிக்கை கண்டறிந்தது.

” முதலீட்டாளர்களின் நிதி சட்டப்படி பெற்றதா என்பதைச் சரிபார்ப்பதில் உள்ள சிக்கல்கள் மற்றும் இந்த விசா மூலம் கிடைக்கக்கூடிய பண ஆதாயங்களுக்கான வாய்ப்புகள் ஆகியவற்றுடன் இந்த வகையான ஆபத்துக்கள் தொடர்புடையவை. இது முதலீட்டாளர்களை ஏமாற்ற தனிநபர்களை தூண்டக்கூடும் மற்றும் விசா வழங்கும் முறையில் சிலருக்கு விருப்பச்சலுகை வழங்கப்படுகின்றது எனும் தோற்றத்தை ஏற்படுத்தக்கூடும்,” என்று அந்த அறிக்கை தெரிவித்துள்ளது.