ஆண் எழுத்தாளர்களுக்கு பெண்களின் மீதிருந்த தவறான எண்ணங்கள் அனைத்தையும் மீறி, பெண்கள் மற்றும் பாலியல் பற்றிய மிகவும் சுவாரஸ்யமான நுணுக்கமான செய்திகளை வழங்க முடியும். கி.மு 411இல், லிசிஸ்ட்ராட்டா என்ற நாடகத்தை நடத்திய நகைச்சுவை நடிகர் அரிஸ்டோபேன்ஸ், அதில் ஏதென்ஸின் பெண்கள் பெலோபொன்னேசியப் போரின் போது சமாதான விதிமுறைகளை ஒப்புக்கொள்ள தங்கள் கணவர்களை வற்புறுத்துவதற்காக மேற்கொண்ட பாலியல் வேலைநிறுத்தத்தைப் பற்றி சித்தரிக்கிறார்.

இது ஏதென்ஸ் மற்றும் ஸ்பார்டா மற்றும் அவர்களின் கூட்டாளிகளுக்கு இடையே மூன்று தசாப்தங்களாக நடத்தப்பட்ட உண்மையான ஒரு மோதலாகும்.

நாடகத்தில் வரும் பல பெண்கள், தங்கள் இன்பத்தை விட்டுக்கொடுக்க வேண்டியிருப்பதில் மகிழ்ச்சியடையவில்லை. நகைச்சுவைக்காக அதிக காம இச்சைக் கொண்ட கழுதை-பெண்களாக அவர்கள் சித்தரிக்கப்பட்டிருந்தனர். இருந்தபோதிலும், நாடகம் ஒரு தீவிரமான திசையில் திரும்பும் ஒரு தருணத்தில் அரிஸ்டோபேன்ஸ் மிகவும் உறுதியான பெண்ணின் பார்வையை வழங்குகிறார்.

கணவர்களுடன் உடலுறவு கொள்ளாமல் வேலைநிறுத்தம் செய்வதற்கு ஏற்பாடு செய்யும் பிரதான கதாபாத்திரமான கதாநாயகி லிசிஸ்ட்ராட்டா, உண்மையில் போர்க்காலத்தில் பெண்களின் நிலை எப்படி இருக்கும் என்பதை விவரிக்கிறார்.

போர் பற்றி விவாதிக்கப்படும் இடங்களில் பெண்கள் இருக்கத் தடை விதிக்கப்பட்டது மட்டுமல்லாமல், பெண்கள் மீண்டும் மீண்டும் துன்பப்படுத்தப்பட்டனர். மேலும், நீடித்த போர் என்பது திருமணமான பெண்களுக்கு நரகமாக இருந்தாலும், திருமணமாகாத பெண்களின் நிலை மேலும் மோசமானது, திருமணம் செய்து கொள்ளும் வாய்ப்பையே அவர்கள் இழக்கலாம்.

பிரபலமான ஓடிபஸ் ரெக்ஸ் நாடகத்தை எழுதிய சோஃபோக்கிள்ஸ் மிகவும் பிரபலமான நாடக ஆசிரியர். அவருடைய டெரியஸ் என்ற நாடகத்தில் கன்னியாக இருந்து மனைவியாக மாறுவது எப்படி இருக்கும் என்பதை விவரிக்கும் ஒரு பெண் கதாபாத்திரத்தை சித்தரித்திருந்தார்.

“மேலும் இது, ஒரு இரவு நம்மை பிணைத்தது,” என்று கிரேக்க புராணத்தில் குறிப்பிடப்படும் ராணி புரோக்னே கூறுகிறார். “மிகவும் அழகாக இருக்க நாம் இதை ஆராதிக்க வேண்டும்” என்றும் அவர் சொல்கிறார்.

உயர் வகுப்பினரிடையே நிச்சயிக்கப்பட்ட திருமணங்கள் மிகவும் வழக்கமாக இருந்தன. ஒரு பெண்ணின் முதல் பாலியல் அனுபவம் புரோக்னே விவரித்தது போல திசைதிருப்பக்கூடியதாக இருக்கலாம்.

பெண்கள் சில சமயங்களில் பாலியல் தொடர்பான எண்ணங்களை பதிவு செய்வார்கள். பித்தகோரஸின் வட்டத்தில் இருந்த கிரேக்க பெண் தத்துவஞானி தியானோ (சிலர் அவரை அவரது மனைவி என்று கூறுகிறார்கள்), தனது தோழி யூரிடைஸுக்கு அறிவுரைகளை வழங்குவதாகக் கூறப்படும் கடிதம் காலத்தால் அழியாதது என்று கூறப்படுகிறது. அந்தக் கடிதத்தில், ‘ஒரு பெண், தனது கணவருடன் படுக்கைக்குச் செல்லும்போது தனது ஆடைகளுடன் சேர்ந்து தனது நாணத்தையும் களைந்துவிட வேண்டும். மீண்டும் ஆடை உடுத்தும்போது நாணத்தையும் அணிந்துக் கொள்ளலாம்’ என்று அவர் எழுதுகிறார்.

தியானோவின் கடிதம் ஆய்வுக்கு உட்படுத்தப்பட்டுள்ளது, அது உண்மையானதாக இல்லாமல் இருக்கலாம். இருப்பினும், நவீன காலங்களில் பல பெண்கள் ஒருவருக்கொருவர் சொல்லிக் கொள்வதை எதிரொலிப்பதாகவே இது இருக்கிறது, மேலும் இந்த அறிவுரையை அந்த கால பெண்கள் பின்பற்றியதாகத் தெரிகிறது.

பிரபல கிரேக்க கவிஞர் எலிஃபண்டிஸ், பெண்களுக்கு பாலியல் உதவிக்குறிப்புகளை வழங்குவதில் மிகவும் ஆர்வமாக இருந்ததாகக் கூறப்படுகிறது, அதனால் அவர் இந்த தலைப்பில் புத்தகங்களை எழுதினார்.

இன்று அவரது படைப்புகள் இருந்ததற்கான எந்த அறிகுறியும் இல்லை என்றாலும், ரோமானிய கவிஞர் மார்ஷல் மற்றும் ரோமானிய வாழ்க்கை வரலாற்றாசிரியர் சூட்டோனியஸ் இருவரும் இதைப் பற்றி குறிப்பிடுகின்றனர். பாலியல் ஆசைகளுக்குப் பெயர் பெற்றவரான பேரரசர் டைபீரியஸ், எலிஃபண்டிஸ் எழுதிய சில கதைகளின் பிரதிகளை வைத்திருந்ததாக அவர்கள் தெரிவித்தார்கள்.

பிற ஆண்களின் எழுத்துக்களில், பெண்கள் மேற்கோள் காட்டப்படும் இடங்களில், அவர்கள் தங்கள் காமத்தை வெளிப்படையாகக் காட்டாமல் அன்பின் அடிப்படையில் அதனை வெளிப்படுத்திக் கொள்கிறார்கள். இது, மார்ஷியல் மற்றும் கேட்டல்லஸ் உள்ளிட்ட அவர்களின் சமகால ஆண்கள் சிலரிடமிருந்து அவர்களை வேறுபடுத்துகிறது.

“ஒரு பெண், தன் காதலனிடம் அந்தரங்கமான கணத்தில் என்ன சொல்கிறாள் என்பதை காற்றிலும் ஓடும் நீரிலும் எழுதலாம்” என்று கேட்டலஸின் புனைப்பெயர் கொண்ட காதலி லெஸ்பியா அவரிடம் கூறுகிறார். படுக்கையறையில் “தலையணைப் பேச்சு” என்ற சொற்றொடர் நினைவுக்கு வருகிறது.

ரோமானிய பெண் கவிஞர்களின் படைப்புகளில் சிலருடையதே எஞ்சியிருக்கிறது. அவற்றில் சல்பிசியா என்ற கவிஞருடையதும் ஒன்று. தனது பிறந்தநாளன்று, தான் தனது காதலர் செரிந்தஸிடமிருந்து பிரிந்து கிராமப்புறங்களில் இருந்த துயரத்தையும், பின்னர் தான் ரோமில் இருக்க முடியும் என்ற நிம்மதி ஏற்பட்டதையும் ஒரு கவிதையில் விவரிக்கிறார்.

இந்தப் பெண்கள் தங்கள் காதலருடன் உடலுறவு கொள்வதைப் பற்றி உண்மையில் என்ன நினைத்தார்கள் என்பதை வெளிப்படுத்த, அதை விரிவாக விவரிக்க வேண்டிய அவசியமில்லை. ஆண்கள் மூலங்களில் ஆதிக்கம் செலுத்தலாம், ஆனால் அப்ரோடைட் நன்கு அறிந்திருந்தபடி, மூடிய கதவுகளுக்குப் பின் பெண்கள் அதிகமாக உணர்ச்சிவசப்படுவார்கள்.

– இது, பிபிசிக்காக கலெக்டிவ் நியூஸ்ரூம் வெளியீடு