இந்நிலையில்தான், தமிழ்நாட்டில் இந்தத் திட்டத்தைச் செயல்படுத்த மாட்டோம் என்று மத்திய சிறு, குறு மற்றும் நடுத்தரத் தொழில் நிறுவனங்கள் துறை அமைச்சர் ஜிதன்ராம் மஞ்சிக்கு தமிழக முதல்வர் மு.க.ஸ்டாலின் கடிதம் எழுதியுள்ளார்.

அதில், ‘‘பிரதமரின் விஸ்வகர்மா யோஜனா திட்டத்தில், உரிய திருத்தங்களை மேற்கொள்ளுமாறு கடந்த ஜனவரி 4 அன்று, பிரதமர் மோதிக்கு கடிதம் எழுதினேன். அந்தக் கடிதத்தில், விஸ்வகர்மா திட்டம், சாதி அடிப்படையிலான தொழில் முறையை வலுப்படுத்தும் என்பதைக் கருத்தில் கொண்டு, இந்தத் திட்டத்தை ஆய்வு செய்திட தமிழக அரசின் சார்பில் ஒரு குழு அமைக்கப்பட்டதாகவும், இந்தக் குழு விரிவான ஆய்வை மேற்கொண்டு, இந்தத் திட்டத்தில் மாற்றங்களைச் செய்திட பரிந்துரைத்து இருப்பதாகவும் தெரிவித்திருந்தேன்’’ என்று குறிப்பிட்டிருந்தார்.

மேலும், ‘‘அந்தக் குழுவின் பரிந்துரைகள்படி, விண்ணப்பதாரரின் குடும்பம், பாரம்பரியமாக குடும்ப அடிப்படையிலான வர்த்தகத்தில் ஈடுபட வேண்டிய கட்டாயத் தேவை நீக்கப்பட வேண்டும்; அதற்குப் பதிலாக, வழிகாட்டுதல்களில் பட்டியலிடப்பட்டுள்ள எந்தவொரு தொழிலையும் மேற்கொள்ள விரும்பும் எந்தவொரு நபரும் இந்தத் திட்டத்தின் கீழ் உதவி பெற தகுதியுடைவராக இருக்க வேண்டும்.” என்று பரிந்துரைத்து இருப்பதாக மு.க.ஸ்டாலின் தனது கடிதத்தில் குரிப்பிட்டுள்ளார்.

இந்தத் திட்டத்தில் பயன் பெறும் குறைந்தபட்ச வயது வரம்பை 35 ஆக உயர்த்த வேண்டும் எனவும் இதன்மூலம் தங்கள் குடும்ப வர்த்தகத்தைத் தொடர, அதை நன்கு அறிந்தவர்கள் மட்டுமே இந்தத் திட்டத்தின்கீழ் பலன்களைப் பெற முடியும் எனவும் முதல்வர் தெரிவித்துள்ளார்.

“கிராமப்புறங்களில் பயனாளிகளைச் சரி பார்க்கும் பொறுப்பு, கிராமப் பஞ்சாயத்துத் தலைவருக்குப் பதிலாக வருவாய்த் துறையைச் சேர்ந்த கிராம நிர்வாக அலுவலரிடம் ஒப்படைக்கப்பட வேண்டும் என்று கூறியிருந்தேன்’’ என்றும் அந்தக் கடிதத்தில் முதல்வர் தெரிவித்துள்ளார்.

‘‘கடந்த மார்ச் 15ஆம் தேதியன்று, மத்திய அரசின் சிறு, குறு மற்றும் நடுத்தரத் தொழில்கள் அமைச்சகத்தில் இருந்து வந்த பதில் கடிதத்தில், தமிழக அரசு பரிந்துரைத்த திருத்தங்கள் தொடர்பாக எதுவும் குறிப்பிடப்படவில்லை. எனவே, பிரதமரின் விஸ்வகர்மா திட்டத்தைத் தற்போதைய வடிவில் செயல்படுத்துவதை தமிழக அரசு முன்னெடுத்துச் செல்லாது’’ என்று கூறியிருந்த முதல்வர் ஸ்டாலின், மாற்றுத் திட்டம் பற்றியும் அதில் குறிப்பிட்டிருந்தார்.

‘‘சமூகநீதி என்ற ஒட்டுமொத்த கொள்கையின் கீழ், தமிழ்நாட்டில் உள்ள கைவினைக் கலைஞர்களுக்கு அதிகாரம் அளிக்கும் வகையில், சாதி அடிப்படையில் பாகுபாடு காட்டாத கைவினைஞர்களை உள்ளடக்கி, விரிவான திட்டம் ஒன்றை உருவாக்கிட தமிழ்நாடு அரசு முடிவு செய்துள்ளது.

இந்தத் திட்டம், சாதி மற்றும் குடும்பத் தொழில் வேறுபாடின்றி, மாநிலத்தில் உள்ள அனைத்துக் கைவினைக் கலைஞர்களுக்கும் முழுமையான ஆதரவை அளிக்கும். இத்தகைய திட்டம் அவர்களுக்கு நிதியுதவி, பயிற்சி மற்றும் அவர்களின் வளர்ச்சிக்குத் தேவையான அனைத்தையும் விரிவாக உள்ளடக்கியதாக இருக்கும்’’ என்றும் முதல்வர் தெரிவித்துள்ளார்.