പാലക്കാട്: ചെറുപ്പുളശേരി സിഐ ബിനു തോമസിന്റെ (52) ആത്മഹത്യാക്കുറിപ്പ് പുറത്ത്. കോഴിക്കോട് തൊട്ടില്‍പാലം സ്വദേശി ബിനു തോമസിന്റെ ആത്മഹത്യാക്കുറിപ്പില്‍ ഡിവൈഎസ്പിക്കെതിരെ ഗുരുതര ആരോപണങ്ങളാണ് ഉളളത്.
നിലവില്‍ കോഴിക്കോട് ഡിവൈഎസ്പിയായ ഉമേഷിനെതിരെയാണ് ആരോപണം. അനാശാസ്യത്തിന് അറസ്റ്റിലായ യുവതിയെ ഉമേഷ് പീഡിപ്പിച്ചെന്ന് കുറിപ്പില്‍ പറയുന്നു.അമ്മയും രണ്ട് മക്കളുമുള്ള വീട്ടില്‍ സന്ധ്യാസമയത്ത് പോയി പീഡിപ്പിച്ചെന്നാണ് കുറിപ്പിലുള്ളത്. തന്നോടും യുവതിയെ പീഡിപ്പിക്കാന്‍ ഉമേഷ് പറഞ്ഞിരുന്നു. പിന്നീട് താനും ഈ യുവതിയുമായി സൗഹൃദത്തിലായെന്നും സി ഐ സമ്മതിക്കുന്നു.ഇതേ ചൊല്ലി ഡിവൈഎസ്പി ഉമേഷ് തന്നെ നിരന്തരം സമ്മര്‍ദ്ദത്തിലാക്കിയിരുന്നുവെന്നും കുറിപ്പില്‍ പറയുന്നു.
എസ് എച്ച് ഒ ആയിരുന്ന ബിനുവിനെ ഈ മാസം പതിനഞ്ചിനാണ് ക്വാര്‍ട്ടേഴ്‌സില്‍ തൂങ്ങിമരിച്ച നിലയില്‍ കണ്ടെത്തിയത്. ഡ്യൂട്ടിക്കിടെ വിശ്രമിക്കാനെന്ന് പറഞ്ഞ് ക്വാര്‍ട്ടേഴ്സിലേക്ക് പോയ ബിനു തിരികെ എത്താതായതോടെ സഹപ്രവര്‍ത്തകര്‍ അന്വേഷിച്ചെത്തിയപ്പോഴാണ് തൂങ്ങിയ നിലയില്‍ കണ്ടത്. മൃതദേഹത്തിന് സമീപം മുപ്പത്തിരണ്ട് പേജുള്ള ആത്മഹത്യാക്കുറിപ്പും ഉണ്ടായിരുന്നു.
കുടുംബ പ്രശ്‌നങ്ങളാണ് ആത്മഹത്യയ്‌ക്ക് കാരണമെന്നായിരുന്നു ആദ്യം പൊലീസ് പറഞ്ഞത്. എന്നാല്‍ ജോലിസംബന്ധമായ പ്രശ്‌നങ്ങളുണ്ടെന്ന് ആരോപണമുയര്‍ന്നിരുന്നു. ഇതിനിടയിലാണ് ആത്മഹത്യാക്കുറിപ്പ് പുറത്തുവന്നത്. സ്ഥലം മാറ്റം ലഭിച്ച് ആറുമാസം മുന്‍പാണ് ബിനു തോമസ് ചെര്‍പ്പുളശേരിയില്‍ എത്തിയത്.