ഗുവാഹത്തി : അടുത്ത വർഷത്തെ സംസ്ഥാന നിയമസഭാ തെരഞ്ഞെടുപ്പിൽ ഭരണകക്ഷിയായ ബിജെപി സഖ്യത്തെ പരാജയപ്പെടുത്താൻ കുറഞ്ഞത് എട്ട് പ്രതിപക്ഷ പാർട്ടികളെങ്കിലും ഒറ്റക്കെട്ടായി പോരാടാൻ തീരുമാനിച്ചിട്ടുണ്ടെന്ന് അസം കോൺഗ്രസ് പ്രസിഡന്റ് ഗൗരവ് ഗൊഗോയ്. 126 അംഗ അസം നിയമസഭയിലേക്കുള്ള തിരഞ്ഞെടുപ്പ് അടുത്ത വർഷം മാർച്ച്-ഏപ്രിൽ മാസങ്ങളിൽ നടക്കാൻ സാധ്യതയുണ്ടെന്ന് അദ്ദേഹം പറഞ്ഞു.
കഴിഞ്ഞ യോഗത്തിൽ വിവിധ വിഷയങ്ങളിൽ ഞങ്ങൾ പ്രതിപക്ഷ പാർട്ടികൾ ആഴത്തിലുള്ള ചർച്ചകൾ നടത്തി. ബിജെപിയുടെ അതിക്രമങ്ങളിൽ നിന്നും മുഖ്യമന്ത്രി ഹിമന്ത ബിശ്വ ശർമ്മയുടെ അനീതിയിൽ നിന്നും അസമിലെ ജനങ്ങളെ മോചിപ്പിക്കാൻ നാമെല്ലാവരും ഒന്നിച്ചിരിക്കുന്നു. 2026 ലെ നിയമസഭാ തിരഞ്ഞെടുപ്പിൽ ഞങ്ങൾ ഒരുമിച്ച് പോരാടും. ഇന്നത്തെ യോഗത്തിന്റെ പ്രധാന തീരുമാനം ഇതായിരുന്നു. മറ്റ് വിഷയങ്ങളും ഉണ്ടെന്നും വരും ദിവസങ്ങളിൽ അവ ക്രമേണ പൊതുജനങ്ങളെ അറിയിക്കുമെന്നും അദ്ദേഹം പറഞ്ഞു.
കോൺഗ്രസ്, കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്) (സിപിഐ-എം), റൈജോർ ദൾ, അസം ജാതിയ പരിഷത്ത്, കമ്മ്യൂണിസ്റ്റ് പാർട്ടി ഓഫ് ഇന്ത്യ (സിപിഐ), കമ്മ്യൂണിസ്റ്റ് പാർട്ടി ഓഫ് ഇന്ത്യ (മാർക്സിസ്റ്റ്-ലെനിനിസ്റ്റ്) ലിബറേഷൻ, ജതിയ ദൾ-അസോം (ജെഡിഎ), കർബി
ആംഗ്ലോംഗ് ആസ്ഥാനമായുള്ള ഓൾ പാർട്ടി ഹിൽ ലീഡേഴ്‌സ് കോൺഫറൻസ് (എപിഎച്ച്എൽസി) എന്നിവയാണ് എട്ട് പാർട്ടികൾ.
യോഗത്തെക്കുറിച്ച് റൈജോർ ദൾ എംഎൽഎ അഖിൽ ഗൊഗോയും മാധ്യമങ്ങളോടായി സംസാരിച്ചു. വരും ദിവസങ്ങളിൽ എല്ലാ പ്രധാന വിഷയങ്ങളിലും എല്ലാ പ്രതിപക്ഷ പാർട്ടികളും ഏകോപിത സമീപനം സ്വീകരിക്കും. വരാനിരിക്കുന്ന നിയമസഭാ ശീതകാല സമ്മേളനത്തിൽ എല്ലാ പ്രതിപക്ഷ പാർട്ടികളും ഐക്യത്തോടെ ശബ്ദമുയർത്തും. എല്ലാ വേദികളിലും ഞങ്ങൾ ഒരുമിച്ചായിരിക്കും.
വരും ദിവസങ്ങളിൽ എല്ലാ പാർട്ടികളും അവരുടെ അജണ്ടയ്‌ക്ക് അന്തിമരൂപം നൽകുമെന്നും പ്രതിപക്ഷ പാർട്ടികളുടെ പൊതു പ്രകടന പത്രികയെക്കുറിച്ചുള്ള ചർച്ചകൾ ആരംഭിക്കാൻ ഈ മാസം വീണ്ടും യോഗം ചേരുമെന്നും യോഗത്തിൽ തീരുമാനിച്ചതായി ഗൊഗോയ് പറഞ്ഞു.
അതേ സമയം ഈ പ്രതിപക്ഷ ഐക്യത്തിൽ എഐയുഡിഎഫ് പങ്കെടുക്കില്ല. നിലവിൽ 126 അംഗ അസം നിയമസഭയിൽ ഭരണകക്ഷിയായ ബിജെപിക്ക് 64 എംഎൽഎമാരുണ്ട്. കൂടാതെ സഖ്യകക്ഷികളായ അസം ഗണ പരിഷത്തിന് (എജിപി) ഒമ്പതും യുപിപിഎല്ലിന് ഏഴ് എംഎൽഎമാരും ബിപിഎഫിന് മൂന്ന് എംഎൽഎമാരുമുണ്ട്. എന്നാൽ പ്രതിപക്ഷത്ത് കോൺഗ്രസിന് 26 ഉം എഐയുഡിഎഫിന് 15 ഉം സിപിഐഎമ്മിന് ഒരു എംഎൽഎയുമുണ്ട്. കൂടാതെ ഒരു സ്വതന്ത്ര എംഎൽഎയുമുണ്ട്.
അതേ സമയം ഓഗസ്റ്റിൽ അസം മുഖ്യമന്ത്രി ഹിമന്ത ബിശ്വ ശർമ്മ, കേന്ദ്രമന്ത്രി സർബാനന്ദ സോനോവാൾ, എജിപി മേധാവി അതുൽ ബോറ എന്നിവരുൾപ്പെടെ നിരവധി എൻഡിഎ നേതാക്കൾ അടുത്ത വർഷത്തെ നിയമസഭാ തെരഞ്ഞെടുപ്പിൽ 100 സീറ്റുകൾ നേടുക എന്ന ലക്ഷ്യം വച്ചിരുന്നു.