അബുദാബി: യുഎഇ തലസ്ഥാന നഗരിയിലെ പ്രമുഖ സാംസ്‌കാരിക സംഘടനയായ ഇന്ത്യ സോഷ്യല്‍ സെന്റര്‍ സംഘടിപ്പിക്കുന്ന വിപുലമായ ഓണാഘോഷങ്ങള്‍ക്ക് ഒരുക്കം തുടങ്ങി. നവംബര്‍ ഏഴുവരെ നീണ്ടുനില്‍ക്കുന്ന ആഘോഷ പരിപാടികള്‍ക്ക് സെപ്റ്റംബര്‍ 13ന് തുടക്കം കുറിക്കുമെന്ന് പ്രസിഡണ്ട ബിജി എം തോമസ്, ജനറല്‍ സെക്രട്ടറി ലിംസണ്‍ കെ ജേക്കബ്, ട്രഷറര്‍ ജോണ്‍ ജോസഫ് എന്നിവര്‍ വാര്‍ത്താ സമ്മേളനത്തില്‍ അറിയിച്ചു.

ഐഎസ്‌സിയില്‍ സംഘടിപ്പിക്കുന്ന ഐസ്‌സി-എഫ്‌സിസി ഓണസദ്യയില്‍ 5000ത്തിലധികം പേര്‍ക്കാണ് സദ്യയൊരുക്കുന്നത്. കേരളത്തിലെ പ്രമുഖ പാചക വിദഗ്ദനായ കണ്ണന്റെ നേതൃത്വത്തിലാണ് സദ്യ തയാറാക്കുക. സെപ്റ്റംബര്‍ 13ന് പൂക്കള മത്സരം നടക്കും. 15ന് പരമ്പരാഗത ഓണക്കളികളും 17ന് യുവജന ഓണാഘോഷവും നടക്കും. 19ന് പ്രമുഖ ഗായകന്‍ ജാസി ഗിഫ്റ്റ് നയിക്കുന്ന ഓണം ഗ്രാന്റ് മ്യൂസിക്കല്‍ നൈറ്റും നവംബര്‍ 7ന് തിരുവാതിര മത്സരവും നടക്കും.

വാര്‍ത്താ സമ്മേളനത്തില്‍ എന്റര്‍ടൈന്‍മെന്റ് സെക്രട്ടറി കെ സി അജിത്, ഓണാഘോഷ കമ്മിറ്റി കണ്‍വീനര്‍ കുഞ്ചേറിയ ജോസഫ്, എസ്എഫ്‌സി ഗ്രൂപ്പ് ചെയര്‍മാന്‍ കെ മുരളീധരന്‍ എന്നിവര്‍ സന്നിഹിതരായിരുന്നു.