ആലപ്പുഴ: ഡ്രൈവിംഗ് സ്കൂള് ഉടമയില് നിന്ന് കൈക്കൂലി വാങ്ങി വീട്ടിലെത്തിക്കുന്നതിനിടെ മോട്ടോര് വെഹിക്കിള് ഇന്സ്പെക്ടറും ഏജന്റും വിജിലന്സിന്റെ പിടിയിലായി. ഡ്രൈവിംഗ് ടെസ്റ്റ് പാസാക്കി നല്കാനാണ് ചേര്ത്തല ജോയിന്റ് ആര്ടിഒ ഓഫീസിലെ മോട്ടോര് വെഹിക്കിള് ഇന്സ്പെക്ടര് കെ ജി ബിജു ഏജന്റ് ജോസ് മുഖേന കൈക്കൂലി വാങ്ങിയത്. കോട്ടയം വിജിലന്സ് കോടതി ഇരുവരെയും റിമാന്ഡ് ചെയ്തു. ബിജുവിനെതിരെ ഒട്ടേറെ പരാതികള് നിലവിലുണ്ട്.
തണ്ണീര്മുക്കം സ്വദേശിയായ ഡ്രൈവിംഗ് സ്കൂള് ഉടമ നല്കിയ പരാതിയിലാണ് ഇരുവരും പിടിയിലായത്. ഏജന്റ് കൈപ്പറ്റിയ കൈക്കൂലിപ്പണം എംവിഐഎംവിഐ ബിജുവിന്റെ ചേര്ത്തലയിലെ വീട്ടിലെത്തി കൈമാറുന്നതിനിടെയാണ് വിജിലന്സ് സംഘം ഇരുവരെയും പിടികൂടിയത്.
വര്ഷങ്ങളായി ബിജു വിജിലന്സിന്റെ കര്ശന നിരീക്ഷണത്തിലായിരുന്നു. ഇയാള്ക്കെതിരെ അനധികൃത സ്വത്തുസമ്പാദന കേസില് അന്വേഷണം നടക്കുന്നുണ്ട്.