വാഷിങ്ടണ്: യു.എസിന്റെ വെടിനിര്ത്തല് നിര്ദേശങ്ങള് ഇറാന് തള്ളിയതിന് പിന്നാലെ ഇക്കാര്യത്തില് പ്രതികരിച്ച് യു.എസ് പ്രസിഡന്റ് ഡോണള്ഡ് ട്രംപ്. വെടിനിര്ത്തല്കരാര് തള്ളിയതിന് ഇറാന് വലിയ വിലകൊടുക്കേണ്ടി വരുമെന്ന് ട്രംപ് ഭീഷണിമുഴക്കി.
യുദ്ധം ഉടന് അവസാനിക്കും. ഇറാന് ആണവായുധങ്ങള് ഇല്ലെന്ന് ഉറപ്പാക്കുന്നതിനായാണ് യുദ്ധമെന്നും ട്രംപ് പറഞ്ഞു. അതേസമയം, ഇറാന് ഡോണള്ഡ് ട്രംപ് കഴിഞ്ഞ ദിവസം അന്ത്യശാസനം നല്കിയിരുന്നു. വെടിനിര്ത്തല് കരാര് അംഗീകരിക്കുന്നതിനാണ് അന്ത്യശാസനം നല്കിയത്. എന്നാല്, ട്രംപിന്റെ അന്ത്യശാസം ഇറാന് വകവെച്ചിരുന്നില്ല.
അതേസമയം, ഇറാന്റെ സൗത്ത് പാര്സ് പെട്രോകെമിക്കല് പ്ലാന്റ് ഇസ്രായേല് ആക്രമിച്ചു. ഇസ്രായേല് പ്രതിരോധമന്ത്രി കാറ്റ്സാണ് ഇക്കാര്യം അറിയിച്ചത്. ഇറാന്റെ അടിസ്ഥാന മേഖലക്ക് നേരെയുള്ള ആക്രമണങ്ങള് തുടരുമെന്നും ഇസ്രായേല് അറിയിച്ചു.
മധ്യസ്ഥ രാജ്യങ്ങള് വഴി യു.എസ്-ഇറാന് വെടിനിര്ത്തല് ചര്ച്ചകള്ക്ക് തിരിക്കട്ട നീക്കങ്ങള് നടക്കുന്നതിനിടെയാണ് ഇറാന്റെ തന്ത്രപ്രധാന ഊര്ജ സ്രോതസ്സായ വാതക പാടത്തിനുനേരെ ഇസ്രായേലിന്റെ ആക്രമണം നടക്കുന്നത്. ലോകത്തിലെ ഏറ്റവും വലിയ പ്രകൃതി വാതക ശേഖരമാണ് ഖത്തര് തീരത്തിനും ഇറാന് തീരത്തിനുമിടയില് പേര്ഷ്യന് ഗള്ഫില് സ്ഥിതി ചെയ്യുന്ന സൗത്ത് പാര്സ് പ്രകൃതി വാതക പാടം.
ഇറാന്റെ പെട്രോകെമിക്കല് ഉല്പാദനത്തിന്റെ പകുതിയും ഈ പ്ലാന്റിലാണ് നടക്കുന്നത്. കൂടാതെ, തെക്കന് ഇറാനിലെ മാര്വ്ദഷ്ത് നഗരത്തിലെ പെട്രോകെമിക്കല് സമുച്ചയത്തിലും അമേരിക്ക-ഇസ്രായേല് സഖ്യം ആക്രമണം നടത്തിയതായി ഫാര്സ് വാര്ത്താ ഏജന്സി റിപ്പോര്ട്ട് ചെയ്തു. സൗത്ത് പാര്സില് ഇസ്രായേലിന്റെ ആക്രമണം മൂലം ഉണ്ടായ തീ മിനിറ്റുകള്ക്കുള്ളില് നിയന്ത്രണ വിധേയമാക്കിയെന്നാണ് പുറത്തുവരുന്ന വിവരം.
പശ്ചിമേഷ്യയില് വര്ദ്ധിച്ചുവരുന്ന സംഘര്ഷങ്ങള്ക്കിടയില്, 45 ദിവസത്തെ താല്ക്കാലിക വെടിനിര്ത്തലിനായി അമേരിക്കയും ഇറാനും മധ്യസ്ഥ രാജ്യങ്ങളും ചര്ച്ച നടത്തുന്നതായി റിപ്പോര്ട്ട്. യുദ്ധത്തിന് ശാശ്വതമായ അന്ത്യം കുറിക്കാന് ലക്ഷ്യമിട്ടുള്ളതാണ് നീക്കമെന്ന് ചര്ച്ചകളെക്കുറിച്ച് അറിവുള്ള നാല് യുഎസ്, ഇസ്രായേല്, പ്രാദേശിക സ്രോതസ്സുകളെ ഉദ്ധരിച്ച് ആക്സിയോസ് ന്യൂസ് ഞായറാഴ്ച റിപ്പോര്ട്ട് ചെയ്തു.