സ്റ്റാവംഗര്‍: അഞ്ച് തവണ ലോകചെസ് ചാമ്പ്യനായ, കഴിഞ്ഞ 14 വര്‍ഷമായി ലോകചെസില്‍ ഒന്നാം റാങ്കില്‍ തുടരുന്ന മാഗ്നസ് കാള്‍സന്റെ ജന്മരാജ്യമാണ് നോര്‍വ്വെ. പൊതുവെ ക്ലാസിക് ചെസ് മത്സരത്തില്‍ (ക്ലാസിക് ചെസ് ടെസ്റ്റ് ക്രിക്കറ്റ് പോലെ ഏറെ സമയം നല്‍കുന്ന കളിയില്‍ ഒന്നരമണിക്കൂറില്‍ 40 കരുനീക്കങ്ങള്‍ നടത്തിയാല്‍ മതിയാവും.) താല്‍പര്യമില്ലാത്ത മാഗ്നസ് കാള്‍സന്‍ ഇപ്പോള്‍ ഫ്രീസ്റ്റൈല്‍ ചെസിന്റെ പിന്നാലെയാണ്. പക്ഷെ ലോക ചെസ് ചാമ്പ്യനായ ഗുകേഷ് ലോകചെസ് കിരീടത്തിന് യോഗ്യനല്ലെന്ന് പല കുറി പ്രസ്താവന നടത്തിയ മാഗ്നസ് കാള്‍സന്‍ അത് തെലിയിക്കാന്‍ കൂടിയാണ് ഇക്കുറി നോര്‍വെയിലെ സ്റ്റാവങ്കറില്‍ നടക്കുന്ന നോര്‍വ്വെ ചെസ്സില്‍ പങ്കെടുക്കാന്‍ എത്തിയത്.
മാഗ്നസ് കാള്‍സന്റെ മനസ്സിലിരുപ്പ് നടന്നു. ആദ്യ കളിയില്‍ തന്നെ കാള്‍സന്‍ ഗുകേഷിനെ തോല്‍പിച്ചു. പിന്നെ നടന്നത് രസകരമായ റിസള്‍ട്ടുകളാണ്. ഗുകേഷ് ലോക രണ്ടാം നമ്പര്‍ താരമായ യുഎസിന്റെ ഹികാരു നകാമുറയെ തോല്‍പിക്കുന്നു. പക്ഷെ ഇതേ ഹികാരു നകാമുറ ലോക ഒന്നാം നമ്പര്‍ താരം മാഗ്നസ് കാള്‍സനെ തോല്‍പിക്കുന്നു. ലോക ഒമ്പതാം നമ്പര്‍ താരമായ ചൈനയുടെ വെയ് യി ഒന്നാം നമ്പര്‍ താരമായ മാഗ്നസ് കാള്‍സനെ തോല്‍പിക്കുന്നു.
ലോക മൂന്നാം നമ്പര്‍ താരമായ ഇന്ത്യയുടെ അര്‍ജുന്‍ എരിഗെയ്സി അഞ്ചാം നമ്പര്‍ താരമായ ഗുകേഷിനെ മാത്രമല്ല ലോക രണ്ടാം നമ്പര്‍ താരമായ ഹികാരു നകാമുറയെയും തോല്‍പിച്ചു. ആദ്യ രണ്ട് തോല്‍വിയില്‍ നിന്നും ഉയിര്‍ത്തെഴുന്നേറ്റ ഗുകേഷാകട്ടെ ആദ്യം ലോക രണ്ടാം നമ്പര്‍ താരമായ ഹികാരു നകാമുറയെ തോല്‍പിച്ചു. പിന്നീട് തൊട്ടടുത്ത റൗണ്ടില്‍ ലോക നാലാം നമ്പര്‍ താരമായ യുഎസിന്റെ ഫാബിയാനോ കരുവാനയെ തോല്‍പിച്ചു.
ലോക നാലാം നമ്പര്‍ താരമായ യുഎസിന്റെ ഫാബിയാനോ കരുവാനയാകട്ടെ സ്വന്തം നാട്ടുകാരനും ലോക രണ്ടാം നമ്പര്‍ താരവുമായി ഹികാരു നകാമുറയെ തോല്‍പിച്ചു. ഇനി ഏറ്റവും തമാശ ചൈനയിലെ ഒന്നാം റാങ്കുകാരനും ലോക ഒമ്പതാം റാങ്കുകാരനുമായ വെയ് യി കഴിഞ്ഞ മൂന്ന് റൗണ്ടുകളില്‍ നേടിയ വിജയമാണ്. വെയ് യി ഒന്നാം നമ്പര്‍ താരം മാഗ്നസ് കാള്‍സന്‍, രണ്ടാം നമ്പര്‍ താരം ഹികാരു നകാമുറ, അഞ്ചാം നമ്പര്‍ താരം ഗുകേഷ് എന്നിവരെ തോല്‍പിച്ചിരിക്കുകയാണ്.
ആരും നോര്‍വ്വെ ചെസ്സില്‍ അജയ്യരല്ലെന്ന് മാത്രമല്ല. എല്ലാവരും അന്യോന്യം തോല്‍പിക്കുകയും ചെയ്യുന്നു എന്നത് ഈ ടൂര്‍ണ്ണമെന്‍റിനെ ഇക്കുറി കൂടുതല്‍ ശ്രദ്ധേയമാക്കിയിരിക്കുകയാണ്.