ആലപ്പുഴ: ബൈപാസില്‍ കാറുകള്‍ കൂട്ടിമുട്ടി ഒരുകുടുംബത്തിലെ നാലുപേര്‍ക്ക് പരിക്കേറ്റു. കൊല്ലക്കടവ് പാറാട്ട് വീട് സാം (66), ഭാര്യ അജിത (60), മകള്‍ റൈസ (37), റൈസയുടെ മകള്‍ ആന്‍പ്രിയ (11) എന്നിവര്‍ക്കാണ് പരിക്കേറ്റത്.
പരിക്കേറ്റവര്‍ വണ്ടാനം മെഡിക്കല്‍ കോളേജ് ആശുപത്രിയില്‍ ചികിത്സയിലാണ്. കഴിഞ്ഞ ദിവസം വൈകുന്നേരം ആലപ്പുഴ കടപ്പുറം വനിത – ശിശു ആശുപത്രിക്ക് സമീപത്തെ ബൈപാസ് മേല്‍പാലത്തിലായിരുന്നു അപകടം.
എതിര്‍ദിശയില്‍നിന്ന് വന്ന കാറുകള്‍ തമ്മിലാണ് കൂട്ടിയിടിച്ചത്. എറണാകുളത്തുനിന്ന് കൊല്ലത്തേക്ക് പോയ ക്രെറ്റയും എതിര്‍ദിശയില്‍നിന്ന് വന്ന ഫോര്‍ച്യൂണറും തമ്മില്‍ ഇടിക്കുകയായിരുന്നു.ഫോര്‍ച്യൂണറില്‍ ഡ്രൈവര്‍ മാത്രമാണുണ്ടായിരുന്നത്.