ടെൽ അവീവ് : ഇറാനെതിരായ പോരാട്ടത്തിൽ ഇസ്രായേലും അമേരിക്കയും ചരിത്രപരമായ നേട്ടങ്ങൾ കൈവരിച്ചതായി ഇസ്രായേൽ പ്രധാനമന്ത്രി ബെഞ്ചമിൻ നെതന്യാഹുവിന്റെ വക്താവ് പറഞ്ഞു. ഇറാൻ പുതിയ ഭൂഗർഭ ബങ്കറുകളിൽ അണുബോംബ് പദ്ധതി പുനർനിർമ്മിക്കുന്നതിനാലും മിഡിൽ ഈസ്റ്റിലെ ഇസ്രായേലിനെയും അമേരിക്കൻ സേനയെയും ആക്രമിക്കാൻ ഇറാൻ പദ്ധതിയിട്ടിരിക്കുന്നതിന്റെ സൂചനകൾ ഉള്ളതിനാലുമാണ് ആക്രമണങ്ങൾ അനിവാര്യമെന്ന് ഷോഷ് ബെഡ്രോസിയൻ അവകാശപ്പെട്ടു. എന്നിരുന്നാലും ഈ അവകാശവാദങ്ങൾക്ക് അദ്ദേഹം തെളിവുകളൊന്നും നൽകിയില്ല.
അതേ സമയം ഇറാനിയൻ തലസ്ഥാനമായ ടെഹ്റാനിലെ ഇറാനിയൻ സർക്കാർ സൈനിക അടിസ്ഥാന സൗകര്യങ്ങൾ ലക്ഷ്യമിട്ടാണ് ആക്രമണം നടത്തിയതെന്ന് ഇസ്രായേൽ സൈന്യം പ്രസ്താവനയിൽ പറഞ്ഞു. ആക്രമണത്തിന്റെ കൃത്യമായ സ്ഥലം പ്രസ്താവനയിൽ വ്യക്തമാക്കിയിട്ടില്ല. നേരത്തെ കിഴക്കൻ ടെഹ്റാനിലെ ഒരു കോമ്പൗണ്ടിൽ ഇസ്രായേൽ സൈന്യം വലിയ തോതിലുള്ള ആക്രമണം നടത്തിയിരുന്നു.
ഇതിനിടെ ഇസ്രായേലിന്റെ ഡിമോണ ആണവ കേന്ദ്രം ലക്ഷ്യമിടുമെന്ന് ഇറാനിയൻ ഉദ്യോഗസ്ഥൻ ഭീഷണിപ്പെടുത്തി. യുഎസും ഇസ്രായേലും ടെഹ്റാനിലെ സർക്കാരിനെ അട്ടിമറിക്കാൻ ശ്രമിച്ചാൽ ഡിമോണ ആണവ കേന്ദ്രം ലക്ഷ്യമിടുമെന്നാണ് ഒരു ഇറാനിയൻ സൈനിക ഉദ്യോഗസ്ഥൻ പറഞ്ഞത്.