ന്യൂദല്‍ഹി: 2026-ല്‍ നടക്കാനിരിക്കുന്ന ഇസ്പോർട്സ് വേള്‍ഡ് കപ്പ് ചെസ്സ് പ്രധാന ടൂർണമെന്റിലേക്ക് യോഗ്യത നേടുന്ന ആദ്യത്തെ ഇന്ത്യൻ താരമായി തമിഴ്നാട്ടിലെ ഗ്രാന്‍റ് മാസ്റ്ററായ അരവിന്ദ് ചിദംബരം.അറ്റ്‌ലാന്റയില്‍ നടന്ന ‘റോഡ് ടു ഇഡബ്ല്യുസി’ ക്വാളിഫയർ മത്സരത്തില്‍ തകർപ്പൻ വിജയം കൈവരിച്ചാണ് അരവിന്ദ് ഈ അപൂർവ്വ നേട്ടത്തിലേക്ക് എത്തിയത്.

ആഗോള ഇസ്പോർട്സ് ആൻഡ് ഗെയിമിംഗ് ബ്രാൻഡായ ‘S8UL’ നെ പ്രതിനിധീകരിച്ചാണ് അരവിന്ദ് ഈ ടൂർണമെന്റില്‍ മാറ്റുരച്ചത്. ഈ വിജയത്തോടെ ഇസ്പോർട്സ് വേള്‍ഡ് കപ്പില്‍ S8UL തങ്ങളുടെ മൂന്നാമത്തെ ടൂർണമെന്റ് പ്രാതിനിധ്യവും ഉറപ്പിച്ചു.

തീക്ഷ്ണമായ സമ്മർദ്ദവും വേഗതയേറിയ നീക്കങ്ങളും ആവശ്യപ്പെടുന്ന റാപ്പിഡ് ഫോർമാറ്റിലായിരുന്നു മത്സരങ്ങള്‍ നടന്നത്. ഇൻക്രിമെന്റുകള്‍ ഇല്ലാത്ത 10 മിനിറ്റ് ഗെയിമുകളായതിനാല്‍ ചെറിയൊരു പിഴവിന് പോലും ഇവിടെ സ്ഥാനമുണ്ടായിരുന്നില്ല. ഗ്രൂപ്പ് ഘട്ടത്തില്‍ കൈലർ റെയ്ൻസ്, ജസ്റ്റിൻ ലിയാങ്, ഒലെക്സാണ്ടർ ബോർട്ട്നിക്, ക്രിസ്റ്റഫർ വൂ എന്നിവരെ പരാജയപ്പെടുത്തി മികച്ച ഫോമിലായിരുന്ന അരവിന്ദ് പ്ലേഓഫിലേക്ക് മുന്നേറിയിരുന്നു.

ഈ ചരിത്ര വിജയത്തിലൂടെ ക്വാളിഫയർ കിരീടം സ്വന്തമാക്കിയ അരവിന്ദ് ചിദംബരത്തിന് 15,000 യുഎസ് ഡോളർ സമ്മാനത്തുകയായി ലഭിക്കും. ഇതോടൊപ്പം, വരാനിരിക്കുന്ന ഇസ്പോർട്സ് വേള്‍ഡ് കപ്പ് ചെസ്സ് മെയിൻ ഇവന്റിലേക്ക് നേരിട്ട് കളിപ്പാൻ സ്ഥിരീകരിച്ച എട്ട് താരങ്ങളില്‍ ഒരാളായും അരവിന്ദ് മാറി. ആഗസ്റ്റ് 11 മുതല്‍ 15 വരെ ആണ് ഈ ടൂര്‍ണ്ണമെന്‍റ്.