തിരുവനന്തപുരം: അന്തരിച്ച മുന് മുഖ്യമന്ത്രി ഉമ്മന്ചാണ്ടിക്കെതിരെയും മകന് ചാണ്ടി ഉമ്മന് എംഎല്എയ്ക്കെതിരെയും ആരോപണങ്ങളുമായി ഗതാഗത മന്ത്രി കെ.ബി. ഗണേഷ് കുമാര്.മന്ത്രിസ്ഥാനം രാജിവെച്ചപ്പോള് പ്രശ്നങ്ങള് പരിഹരിച്ച് തിരിച്ചെടുക്കാമെന്ന് വാഗ്ദാനം നല്കി തന്നെ പറ്റിച്ച ആളാണ് ഉമ്മന്ചാണ്ടി.തന്നോട് അദ്ദേഹം ചെയ്തത് വലിയ ദ്രോഹമാണെന്നും ഗണേഷ് കുമാര് മാധ്യമങ്ങളോട് പറഞ്ഞു.
തന്റെ കുടുംബം തകര്ക്കാനും മക്കളെ തന്നില് നിന്ന് വേര്പിരിക്കാനും ഉമ്മന്ചാണ്ടി ബോധപൂര്വ്വം ശ്രമിച്ചു.കുടുംബതര്ക്കങ്ങളില് മധ്യസ്ഥനെന്ന വ്യാജേന ഇടപെട്ട് തന്നെ ചതിക്കുകയായിരുന്നു ഉമ്മന് ചാണ്ടി.
സോളാര് കേസുമായി ബന്ധപ്പെട്ട് ചാണ്ടി ഉമ്മന് ഉന്നയിച്ച ആരോപണങ്ങള്ക്കും ഗണേഷ് കുമാര് മറുപടി നല്കി. ‘കള്ളസാക്ഷി പറയരുത്’ എന്ന ബൈബിള് വചനം ചാണ്ടി ഉമ്മന് ഓര്ക്കണം.അറിയാത്ത കാര്യങ്ങളില് അഭിപ്രായം പറയുന്നത് അദ്ദേഹത്തിന് ഗുണകരമാകില്ല- ഗണേഷ് കുമാര് പരിഹസിച്ചു.
സോളാര് കേസിലെ കത്തുമായി ബന്ധപ്പെട്ട് ഉമ്മന്ചാണ്ടിക്ക് ക്ലീന് ചിറ്റ് നല്കുന്ന മൊഴിയാണ് താന് സിബിഐക്ക് നല്കിയത്.എന്നാല് ആ നന്ദി പോലും ഉമ്മന്ചാണ്ടി കാണിച്ചില്ല.ചാണ്ടി ഉമ്മന് മിണ്ടാതിരിക്കുന്നതാണ് നല്ലതെന്നും അല്ലെങ്കില് പല കാര്യങ്ങളും തനിക്ക് വിളിച്ചു പറയേണ്ടി വരുമെന്നും ഗണേഷ് കുമാര് പറഞ്ഞു.
രാഹുല് മാങ്കൂട്ടത്തിലിനെതിരെയും രൂക്ഷമായ വിമര്ശനമാണ് മന്ത്രി ഉന്നയിച്ചത്. അന്തരിച്ച നേതാവ് കെ. കരുണാകരന്റെ ഭാര്യയെക്കുറിച്ച് മോശമായി സംസാരിച്ച രാഹുലിനെ വിലക്കാന് കോണ്ഗ്രസില് ആരും ഉണ്ടായില്ലെന്ന് അദ്ദേഹം കുറ്റപ്പെടുത്തി.
കെ.സി വേണുഗോപാല് അടക്കം മുതിര്ന്ന നേതാക്കള്ക്ക് പോലും ഇത്തരം പരാമര്ശങ്ങളെ തിരുത്താന് തോന്നിയില്ല. തെരഞ്ഞെടുപ്പ് അടുത്തപ്പോഴാണോ ചാണ്ടി ഉമ്മന് ഇത്തരം കാര്യങ്ങള് ഓര്മ്മ വന്നതെന്നും ഗണേഷ് കുമാര് ചോദിച്ചു.