ചിദംബരം എന്നാല്‍ ചിത്ത് ഉറച്ച് അംബരത്തെ കാണാന്‍ കഴിയുന്ന ഇടം എന്നാണ് അര്‍ത്ഥം. ശിവഭഗവാന്റെ ശിഷ്യനും 18 സിദ്ധന്മാരില്‍ ഒരാളുമായ തിരുമൂലര്‍ ചിദംബരത്തില്‍ എത്തി തപസ്സ് ചെയ്തു. അവിടെ അദ്ദേഹത്തിന് മൂന്നാം കണ്ണ് തുറന്ന് കിട്ടി എന്ന് മാത്രമല്ല, ആകാശത്തില്‍ ഏകഭാവത്തില്‍ ഇരിക്കുന്ന ശിവനെ കാണുകയും ചെയ്തു എന്നതാണ് ഐതിഹ്യം. മനം,ബുദ്ധി, ചിത്ത്, അഹങ്കാരം, എന്നിവയില്‍ ചിത്ത് എന്ന ഭാവത്തില്‍ ആരൊരാളുറയ്‌ക്കുന്നുവോ അവന് ആകാശമെല്ലാം കാണാന്‍ കഴിയും എന്നതാണ് ചിദംബരത്തിന്റെ പ്രത്യേകത. .

സാധാരണ മനുഷ്യന് കണ്ണ് തുറന്നാല്‍ ആകാശം കാണാന്‍ കഴിയില്ല. അതിന് മുകളിലേക്ക് ശിരസ്സുയര്‍ത്തി നോക്കണം. എന്നാല്‍ തപസ്സ് ചെയ്യുന്ന യോഗിയ്‌ക്ക് ഇത് ലഭിക്കും. ചിദംബരക്ഷേതര്ത്തിലെ ചിത്ത് സഭൈ എന്ന ധ്യാനമണ്ഡപത്തില്‍ ചെന്നിരുന്ന ധ്യാനം ചെയ്താല്‍ ഈ അവസ്ഥ കിട്ടുമെന്നാണ് പറയപ്പെടുന്നത്. അതായത് 72000 നാഡികളിലൂടെ ഓടുന്ന നമ്മുടെ 21600 ശ്വാസത്തെ തളച്ചുനിര്‍ത്തിയ ശേഷം നമ്മുടെ ശരീരത്തിലെ ഒമ്പത് ദ്വാരങ്ങളെയും അടച്ചാല്‍ നമ്മുടെ മൂന്നാം കണ്ണ് തുറക്കും. ഈ മൂന്നാം കണ്ണ് തുറന്നാല്‍ നമുക്ക് ഏകഭാവത്തിലുള്ള ശിവനെ കാണാം.

ചിദംബരം ക്ഷേത്രത്തിന്റെ നിര്‍മ്മിതിയും നമ്മുടെ ശരീരത്തിന്റെ തന്റെ പ്രതിരൂപമത്രെ. ഒമ്പത് താഴികക്കുടങ്ങള്‍ ചിദംബരം ക്ഷേത്രത്തില‍് ഉണ്ട്. ഇത് മനുഷ്യശരീരത്തിലെ ഒമ്പത് ദ്വാരങ്ങളെയാണ് സൂചിപ്പിക്കുന്നത്. ചിദംബരം ക്ഷേത്രത്തില്‍ 21600 സ്വര്‍ണ്ണ ഓടുകള്‍ ഉണ്ട്. ഇത് നമ്മുടെ 21600 ശ്വാസത്തെ സൂചിപ്പിക്കുന്നു. ഇതിനെ 72000 ആണികള്‍ കൊണ്ട് ഉറപ്പിച്ചിട്ടുണ്ട്. ഇത് നമ്മുടെ നാഡികളാണ്.
അതായത് മനുഷ്യശരീരം തന്നെയാണ് ക്ഷേത്രവും എന്ന് ഭക്തരെ ഓര്‍മ്മിപ്പിക്കുകയാണ് ചിദംബരം ക്ഷേത്രം.