കണ്ണൂർ ; ആക്രമിക്കപ്പെട്ട നടിയെ മുഖ്യമന്ത്രി പിണറായി വിജയൻ ആശ്വസിപ്പിച്ചതായി ഡബ്ബിങ് ആർട്ടിസ്റ്റ് ഭാഗ്യലക്ഷ്മി. കണ്ണൂരിൽ ജനാധിപത്യ മഹിളാ അസോസിയേഷൻ സംഘടിപ്പിച്ച ‘അവൾക്ക് ഒപ്പം’ പരിപാടി ഉദ്ഘാടനം ചെയ്യുകയായിരുന്നു അവർ.

‘ അന്ന് മുക്കാൽ മണിക്കൂറോളം അവളോട് മുഖ്യമന്ത്രി സംസാരിച്ചു. അവൾ നിൽക്കുന്ന മാനസികാവസ്ഥയിൽ അത്രയും സമയം അവളോട് സംസാരിച്ചാൽ മാത്രമേ ആശ്വാസം ലഭിക്കൂ എന്ന് അദ്ദേഹത്തിന് തോന്നിയിരിക്കണം. എന്തിനാണ് ഭയപ്പെടുന്നതെന്നും, തളരുന്നതെന്നും ഞങ്ങളൊക്കെയില്ലേ, സഖാക്കളില്ലേ എന്നും ഇടയ്‌ക്കിടെ അദ്ദേഹം പറയുന്നുണ്ടായിരുന്നു. സാധാരണ ഒരു മിനിറ്റോ രണ്ട് മിനിറ്റോ ആണ് മുഖ്യമന്ത്രി സംസാരിക്കുന്നത്.നീയിന്ന് കേരളത്തിന്റെ മകളാണ്. നിന്നോടൊപ്പമാണ് മനസ്സാക്ഷിയുള്ള ജനങ്ങളെന്നും അദ്ദേഹം പറഞ്ഞു.

ഇതിനു മുൻപ് മൂന്നു തവണ മുഖ്യമന്ത്രിയെ കാണാൻ പോയിട്ടുണ്ട്. എന്തിനാണ് ഇടയ്‌ക്കിടെ കാണാൻ പോകുന്നതെന്ന് പലരും ചോദിച്ചു. അത് അവൾക്ക് ആത്മവിശ്വാസം കിട്ടാനാണ്. ‘ എന്നും ഭാഗ്യലക്ഷ്മി പറഞ്ഞു.