ചങ്ങനാശ്ശേരി: ചങ്ങനാശ്ശേരി എസ്ബി കോളജില് അത്യാധുനിക ഗവേഷണ കേന്ദ്രമായ ഡോ. കെ.എം. എബ്രഹാം സെന്റര് ഫോര് എനര്ജി ആന്ഡ് എന്വയോണ്മെന്റ് ഉപരാഷ്ട്രപതി സി.പി. രാധാകൃഷ്ണന് ഉദ്ഘാടനം ചെയ്തു. ശതാബ്ദി സമാപന സമ്മേളനം 3.30ന് എസ്ബി കോളജ് കവുകാട്ടു ഹാളില് വന്ദേ മാതരത്തോട് കൂടിയാണ് ആരംഭിച്ചത്. കേരള ഗവര്ണര് രാജേന്ദ്രവിശ്വനാഥ ആര്ലേക്കര്, കേന്ദ്ര സഹമന്ത്രി സുരേഷ് ഗോപി, മന്ത്രി വി.എന്. വാസവന്, കൊടിക്കുന്നില് സുരേഷ് എംപി, ജോബ് മൈക്കിള് എംഎല്എ തുടങ്ങിയവര് ആശംസകള് അര്പ്പിച്ചു. ആര്ച്ച് ബിഷപ് മാര് തോമസ് തറയില് സ്വാഗതം ആശംസിച്ചു.
അമ്മയായി… അച്ഛനായി… ആണ്ടവനായി… എന്നും പൂജിക്കുന്ന ഭാരതാംബയെ നമസ്കാരം… എന്ന് പറഞ്ഞുകൊണ്ടാണ് ഉപരാഷ്ടപതി പ്രസംഗം ആരംഭിച്ചത്. ഉപരാഷ്ട്രപതിയുടെ പ്രസംഗം തുടങ്ങിയതോടെ സദസില് ഹര്ഷാരവം ഉയര്ന്നു. നേരത്തെ, 3ന് എന്എസ്എസ് കോളജ് ഗ്രൗണ്ടിലെ ഹെലിപ്പാഡില് ഇറങ്ങിയ ഉപരാഷ്ട്രപതിയെ ഗവര്ണര് രാജേന്ദ്ര വിശ്വനാഥ ആര്ലേക്കര് സ്വീകരിച്ചു. കേന്ദ്രമന്ത്രി സുരേഷ് ഗോപിയും അദ്ദേഹത്തോടൊപ്പം ഉണ്ടായിരുന്നു. ഹെലിപ്പാഡില് നിന്ന് കാര് മാര്ഗം എസ്ബി കോളജിലെത്തിയ ഉപരാഷ്ട്രപതിയെ ആര്ച്ച് ബിഷപ് മാര് തോമസ് തറയില് സ്വീകരിച്ചു. ഉപരാഷ്ട്രപതിയെ കാണാന് റോഡിന്റെ ഇരുവശങ്ങളിലും വന് ജനാവലി തടിച്ചുകൂടി. ശക്തമായ സുരക്ഷാ ക്രമീകരണങ്ങളാണ് ഏര്പ്പെടുത്തിയിരുന്നത്.
ഭാരതത്തിലെ ഏറ്റവും മികച്ച ഗവേഷണ സൗകര്യങ്ങളുള്ള ആര്ട്ട് ആന്ഡ് സയന്സ് കോളജാണ് സെ. ബര്ക്കുമാന്സ്. എന്ഐആര്എഫിന്റെ റാങ്കിങ്ങില് ഇന്ത്യയിലെ ഒന്നാം സ്ഥാനത്തുള്ള കോളജിനേക്കാള് ഉയര്ന്ന സ്കോറാണ് ഗവേഷണമേഖലയില് എസ്ബി കോളജിനുള്ളത്.