തിരുവനന്തപുരം: നാലരപ്പതിറ്റാണ്ടുകാലത്തെ സിപിഎം ബന്ധം ഉപേക്ഷിച്ച എസ്.അനില്‍കുമാര്‍ തിരുവനന്തപുരം കോര്‍പ്പറേഷനില്‍ ഉള്ളൂര്‍ വാര്‍ഡില്‍ നിന്നും ബിജെപി സ്ഥാനാര്‍ത്ഥിയായി ജനവിധി തേടുന്നു. സിഐടിയുവില്‍ നിന്ന് ബിഎംഎസിലേക്ക് അനില്‍കുമാര്‍ എത്തിയതിനു പിന്നില്‍ കമ്യൂണിസ്റ്റ് പ്രസ്ഥാനത്തിന്റെ മൂല്യച്യുതി. സിപിഎമ്മില്‍ ഇപ്പോള്‍ കമ്യൂണിസ്റ്റ്കാരില്ല, മുതലാളിമാര്‍ മാത്രമെന്ന് അനില്‍കുമാര്‍.

വഞ്ചിയൂര്‍ ഏരിയാ കമ്മറ്റിയില്‍ 35 വര്‍ഷം

വഞ്ചിയൂര്‍ ഏരിയാ കമ്മറ്റി രൂപീകരണം മുതല്‍ മുപ്പത്തിനാല് വര്‍ഷം സിപിഎമ്മിന്റെ ഏരിയാ കമ്മറ്റി അംഗമായിരുന്നു. 1995ല്‍ ഉള്ളൂര്‍ പഞ്ചായത്ത് വൈസ് പ്രസിഡന്റ്. 2000ല്‍ ഉള്ളൂര്‍ ഗ്രാമ പഞ്ചായത്ത് കോര്‍പ്പറേഷനിലേക്ക് കൂട്ടിചേര്‍ത്തപ്പോള്‍ ആക്കുളം വാര്‍ഡില്‍ നിന്നും കൗണ്‍സിലറായി. 2008ല്‍ മെഡിക്കല്‍ കോളജ് വാര്‍ഡ് ഉപതെരഞ്ഞെടുപ്പില്‍ വിജയിച്ചു വിണ്ടും കൗണ്‍സിലറായി. 2008ല്‍ ഉള്ളൂര്‍ സര്‍വീസ് സഹകരണ ബാങ്ക് പ്രസിഡന്റ്. 1991 മുതല്‍ 2008 വരെ നാല് തവണ സിപിഎം ഉള്ളൂര്‍ എല്‍ സി സെക്രട്ടറിയായിരുന്നു. സിഐടിയു ജില്ലാ ജോയിന്റ് സെക്രട്ടറി, സംസ്ഥാന കമ്മറ്റി അംഗം എന്നീ നിലകളിലും പ്രവര്‍ത്തിച്ചു. ചുമട്ടു തൊഴിലാളി ഫെഡറേഷന്‍ സംസ്ഥാന എക്‌സിക്യൂട്ടിവ് മെമ്പറും ജില്ലാ സെക്രട്ടറിമാരില്‍ ഒരാളുമായിരുന്നു. സിഐടിയു നേതൃത്വത്തിലുള്ള വഴിയോരകച്ചവടത്തൊഴിലാളി യൂണിയന്‍ ജില്ലാ സെക്രട്ടറിയായും സംസ്ഥാന സെക്രട്ടറിമാരില്‍ ഒരാളായും പ്രവര്‍ത്തിച്ചു. പതിനഞ്ചാം വയസില്‍ സിപിഎം അംഗത്വം ലഭിച്ചു. പതിനാറാമത്തെ വയസില്‍ ബ്രാഞ്ച് സെക്രട്ടറിയായി. എസ്എഫ്‌ഐ, ഡിവൈഎഫ്‌ഐ തുടങ്ങിയ സംഘടനകളില്‍ പ്രവര്‍ത്തിച്ചു. തുടര്‍ന്ന് ട്രേഡ് യൂണിയന്‍ രംഗത്ത് പ്രവര്‍ത്തനം തുടങ്ങി.

മുഖം നോക്കാതെ വിമര്‍ശിച്ചു, സിപിഎമ്മിന് അനഭിമതനായി

അനില്‍കുമാര്‍ ഏരിയാ കമ്മറ്റിക്ക് അപ്പുറം വളരാതിരിക്കാന്‍ സിപിഎമ്മിലെ ചിലര്‍ ശ്രമിച്ചു. പാര്‍ട്ടി കമ്മറ്റികളില്‍ മുഖം നോക്കാതെ ശക്തമായ വിമര്‍ശനങ്ങള്‍ ഉന്നയിച്ചിരുന്നത് കൊണ്ടാകാം നേതാക്കള്‍ക്ക് അനിലിനോട് താത്പര്യമില്ലാതിരുന്നത്. 35 വര്‍ഷം തുടര്‍ച്ചയായി പ്രവര്‍ത്തിച്ചിരുന്ന അനിലിനെ ഒഴിവാക്കി അഞ്ച് വര്‍ഷം പോലും പ്രവര്‍ത്തന പരിചയമില്ലാത്തയാളെ ചുമട്ടുതൊഴിലാളി യൂണിയന്റെ ജില്ലാ സെക്രട്ടറിയാക്കി. സിഐടിയു സംസ്ഥാന സെക്രട്ടറിയായിരുന്ന എളമരം കരീം മുതല്‍ ജില്ലാ പ്രസിഡന്റായിരുന്ന വി.ശിവന്‍കുട്ടി വരെ അനിലിനെ വെട്ടിനിരത്താന്‍ കൂട്ടുനിന്നു. നിരന്തരം തന്നെ അവഗണിക്കുന്നതില്‍ പ്രതിഷേധിച്ച് ചുമതലകളില്‍ നിന്ന് മാറി നിന്നു. അനിലിനെ മാനസികമായും ശാരീരികമായും തളര്‍ത്താന്‍ സിപിഎം, സിഐടിയു സംസ്ഥാന നേതൃത്വം മുതല്‍ സംഘടിതമായി ശ്രമിച്ചു.

കമ്മ്യൂണിസ്റ്റ് മൂല്യങ്ങള്‍ ഒന്നും ഇപ്പോള്‍ ഇല്ല

ഞാന്‍ കണ്ട കമ്മ്യൂണിസ്റ്റ് പ്രസ്ഥാനത്തിന്റെ മൂല്യങ്ങള്‍ ഒന്നും തന്നെ ഇപ്പോള്‍ ഇല്ലെന്നു പറയുന്നു അനില്‍ കുമാര്‍. സ്തുതിപാഠകര്‍ക്കു മാത്രമേ സ്ഥാനമുള്ളൂ എന്ന ഘട്ടം വന്നപ്പോഴാണ് പാര്‍ട്ടി വിടാനുള്ള തീരുമാനമെടുത്തത്. സിപിഎം എല്ലാതരത്തിലുമുള്ള വൃത്തികേടുകളുടെയും കൂമ്പാരമായി മാറിയെന്നും ആജ്ഞാനുവര്‍ത്തികളെ മാത്രമെ ഭാരവാഹി പട്ടികയില്‍ ഉള്‍പ്പെടുത്തൂയെന്നും തിരിച്ചറിഞ്ഞു. അവഗണന താങ്ങാനാകാത്തതായി. 2024ല്‍ ബിഎംഎസില്‍ അംഗത്വമെടുത്തു. ഇപ്പോള്‍ വഴിയോരകച്ചവട യൂണിയന്‍ ജില്ലാ പ്രസിഡന്റും ബിഎംഎസ് ജില്ലാ പ്രവര്‍ത്തക സമിതി അംഗവുമാണ്.

ജനങ്ങള്‍ക്ക് സുപരിചിതന്‍

ഉള്ളൂര്‍ വാര്‍ഡില്‍ സ്ഥാനാര്‍ത്ഥിയായി മത്സരിക്കണമെന്ന് ബിഎംഎസ്, ബിജെപി നേതൃത്വം ആവശ്യപ്പെട്ടതിനെ തുടര്‍ന്നാണ് മത്സര രംഗത്തിറങ്ങിയത്. ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖറില്‍ നിന്നാണ് അംഗത്വമെടുത്തത്. നിരവധി തവണ ജനപ്രതിനിധിയായിരുന്നതിനാല്‍ ജനങ്ങള്‍ക്ക് സുപരിചിതനാണ്. ജനങ്ങള്‍ തന്നെ വിജയിപ്പിക്കുമെന്നുമുള്ള ആത്മവിശ്വാസത്തിലാണ് അനില്‍കുമാര്‍.

യുഡിഎഫ് സ്ഥാനാര്‍ത്ഥിയായി ജോണ്‍സണ്‍ ജോസഫും, എല്‍ഡിഎഫ് സ്ഥാനാര്‍ത്ഥിയായി എസ്.ലിജുവും മത്സരിക്കുന്നു. ദേശാഭിമാനി മുന്‍ ബ്യൂറോ ചീഫ് ശ്രീകണ്ഠന്‍ എല്‍ഡിഎഫ് വിമതനായി മത്സര രംഗത്തുണ്ട്.