ആലപ്പുഴ: ഭാരതാംബയുമായി ബന്ധപ്പെട്ട ചിത്രത്തിലെ വിവാദത്തെ തുടര്‍ന്ന് കൃഷിമന്ത്രി പി.പ്രസാദിന്റെ വീടിന് മുന്നില്‍ പ്രതിഷേധവുമായി ബിജെപി.ആലപ്പുഴ ചാരുമൂട്ടിലെ വീടിന് മുന്നിലാണ് ബി ജെ പി പ്രവര്‍ത്തകര്‍ പ്രതിഷേധിച്ചത്.
ഭാരതാംബയുടെ ചിത്രം വച്ച് പൂജ നടത്തിയാണ് പ്രതിഷേധം നടത്തിയത്. ഇതിനെതിരെ സിപിഎം, സിപിഐ പ്രവര്‍ത്തകരും സ്ഥലത്തെത്തിയതോടെ സ്ഥലത്ത് സംഘര്‍ഷാവസ്ഥ ഉണ്ടായി.ഇരുകൂട്ടരും പ്രദേശത്ത് സംഘടിച്ച് മുദ്രാവാക്യം വിളിച്ച് പ്രതിഷേധിച്ചു.
സാഹചര്യം കണക്കിലെടുത്ത് മേഖലയില്‍ കൂടുതല്‍ പൊലീസിനെ വിന്യസിച്ചിരുന്നു.പരിസ്ഥിതി ദിനത്തോടനുബന്ധിച്ച് രാജ്ഭവനില്‍ സംഘടിപ്പിച്ച ചടങ്ങില്‍ ഭാരതാംബയുടെ ചിത്രം വച്ചതില്‍ പ്രതിഷേധിച്ച് മന്ത്രി പ്രസാദ് ചടങ്ങ് ബഹിഷ്‌കരിച്ചിരുന്നു. മന്ത്രിയുടെ നടപടിയെ ഗവര്‍ണര്‍ രാജേന്ദ്ര വിശ്വനാഥ് ആര്‍ലേക്കര്‍ വിമര്‍ശിക്കുകയും ചെയ്തു. ഇതാണ് വിവാദമായത്.