പാലക്കാട്: കെസിഎ അന്തര്‍ ജില്ലാ അണ്ടര്‍ 19 വനിതാ ക്രിക്കറ്റ് ടൂര്‍ണമെന്റിന്റെ വടക്കന്‍ മേഖലാ മത്സരങ്ങളില്‍ കണ്ണൂരിനും വയനാടിനും കൂറ്റന്‍ വിജയം. കണ്ണൂര്‍ കോഴിക്കോടിനെ 144 റണ്‍സിനും വയനാട് കാസര്‍ഗോഡിനെ 118 റണ്‍സിനുമാണ് തോല്‍പ്പിച്ചത്. ടൂര്‍ണമെന്റില്‍ വയനാടിന്റെ തുടര്‍ച്ചയായ മൂന്നാം വിജയമാണിത്.

കോഴിക്കോടിനെതിരെ ടോസ് നേടി ആദ്യം ബാറ്റ് ചെയ്ത കണ്ണൂര്‍ 30 ഓവറില്‍ മൂന്ന് വിക്കറ്റ് നഷ്ടത്തില്‍ 228 റണ്‍സെടുത്തു. ഭവ്യയും (87) അയോണയും (77) ചേര്‍ന്നുള്ള 144 റണ്‍സിന്റെ തകര്‍പ്പന്‍ കൂട്ടുകെട്ടാണ് കണ്ണൂരിനെ കൂറ്റന്‍ സ്‌കോറിലെത്തിച്ചത്. ക്യാപ്റ്റന്‍ നിവേദ്യമോള്‍ 29 റണ്‍സും നേടി. മറുപടി ബാറ്റിങ്ങിന് ഇറങ്ങിയ കോഴിക്കോട് 26.5 ഓവറില്‍ 84 റണ്‍സിന് ഓള്‍ ഔട്ടായി. നാല് വിക്കറ്റ് വീഴ്‌ത്തിയ അരിതയും രണ്ട് വിക്കറ്റ് വീഴ്‌ത്തിയ അയോണയുമാണ് കണ്ണൂര്‍ ബൗളിങ് നിരയില്‍ തിളങ്ങിയത്.

കാസര്‍ഗോഡിനെതിരെ ആദ്യം ബാറ്റ് ചെയ്ത വയനാട് 27.3 ഓവറില്‍ 175 റണ്‍സിന് പുറത്തായി. 43 റണ്‍സെടുത്ത തീര്‍ത്ഥയാണ് വയനാടിന്റെ ടോപ് സ്‌കോറര്‍. പ്രിഥന (31), ജിഷ്‌ന (21), ധനുഷ്യ (22) എന്നിവരും ഭേദപ്പെട്ട പ്രകടനം കാഴ്ചവെച്ചു. കാസര്‍ഗോഡിന് വേണ്ടി നബ ഫാത്തിമ, അന്‍വിത, റിഥിക എന്നിവര്‍ മൂന്ന് വിക്കറ്റ് വീതം വീഴ്‌ത്തി. മറുപടി ബാറ്റിങ്ങിന് ഇറങ്ങിയ കാസര്‍ഗോഡ് 18.4 ഓവറില്‍ 57 റണ്‍സിന് ഓള്‍ ഔട്ടായി. രണ്ട് വിക്കറ്റം വീതം വീഴ്‌ത്തിയ പാര്‍വ്വതി, അര്‍ച്ചന, വൈഗ, ജിഷ്‌ന എന്നിവരാണ് വയനാടിന്റെ ബൗളിങ് നിരയില്‍ തിളങ്ങിയത്.