ന്യൂദല്ഹി: കേരളത്തിലെ കനത്ത തോല്വിയുടെ പശ്ചാത്തലത്തില് സിപിഎമ്മില് തിരുത്തല് രേഖ കേന്ദ്ര നേതൃത്വം തയാറാക്കുന്നു. കേരളത്തിലെ കനത്ത തോല്വിക്ക് സംഘടനാ ദൗര്ബല്യങ്ങള് കാരണമാണെന്ന് വിലയിരുത്തിയാണ് തെറ്റുതിരുത്തല് രേഖ.
പത്ത് വര്ഷത്തെ ഭരണം മുതിര്ന്ന നേതാക്കളിലടക്കം പാര്ലമെന്ററി വ്യാമോഹത്തിന് വഴി വച്ചെന്ന് ജനറല് സെക്രട്ടറി എം എ ബേബി ചൂണ്ടിക്കാട്ടി.അതേസമയം, സംസ്ഥാനത്തിന്റെ അവലോകനം അതേ പടി അംഗീകരിക്കാതെയാണ് പിബി കേന്ദ്ര കമ്മിറ്റിയില് അവതരിപ്പിക്കേണ്ട കരട് രേഖ തയാറാക്കിയത്.
അടുത്തമാസം 11,12,13 തീയതികളിലായി നടക്കുന്ന കേന്ദ്ര കമ്മറ്റിയില് ചര്ച്ച ചെയ്യാനുള്ള തെറ്റ് തിരുത്തല് രേഖയ്ക്കാണ് ഇന്നലെയും ഇന്നും ചേര്ന്ന പോളിറ്റ് ബ്യൂറോ അന്തിമ രൂപം നല്കിയത്. പതിനഞ്ച് കൊല്ലത്തിന് ശേഷമാണ് ദേശീയ തലത്തില് വീണ്ടും തെറ്റുതിരുത്തല് രേഖ തയാറാക്കി സംഘടനയെ നവീകരിക്കാന് സിപിഎം കേന്ദ്ര നേതൃത്വം ഒരുങ്ങുന്നത്.
കേരളത്തില് പത്ത് കൊല്ലത്തെ ഭരണം പാര്ലമെന്ററി വ്യാമോഹം കൂടാന് സാഹചര്യമായി എന്നാണ് കേന്ദ്ര നേതൃത്വത്തിന്റെ വിലയിരുത്തല്.ജി സുധാകരന്, ടി കെ ഗോവിന്ദന്, ടി വി കുഞ്ഞികൃഷ്ണന് തുടങ്ങിയവര് പാര്ട്ടി വിട്ടതാണ് ചൂണ്ടിക്കാട്ടുന്നത്.എന്നാല് കുടുംബാംഗങ്ങള്ക്കടക്കം സീറ്റ് ഉറപ്പിക്കാന് നേതാക്കള് നടത്തിയ നീക്കങ്ങളും തെറ്റുതിരുത്തല് ചര്ച്ചയായതിന് കാരണമായി. പിണറായിയും എം വി ഗോവിന്ദനും നേതൃത്വത്തില് തുടരുന്നതില് പി ബി മുതല് താഴേ തട്ടുവരെ എതിര്പ്പുണ്ടെങ്കിലും നേതൃമാറ്റം ചര്ച്ച ചെയ്തില്ല.അതേസമയം, തെരഞ്ഞെടുപ്പ് തോല്വിയില് പിണറായിയെയും ഗോവിന്ദനെയും വ്യക്തിപരമായി വിമര്ശിക്കാതെയുള്ള സംസ്ഥാന ഘടകത്തിന്റെ റിപ്പോര്ട്ട് അതേപടി പിബി അംഗീകരിച്ചില്ലെന്നാണ് വിവരം.