ഗസ്സ യുദ്ധം ഉടനടി അവസാനിപ്പിക്കണമെന്ന് ആവശ്യപ്പെട്ട് തെല്‍ അവിവിലെ ഹോസ്‌റ്റേജസ് സ്‌ക്വയറില്‍ പതിനായിരക്കണക്കിന് പേര്‍ അണിനിരന്ന യുദ്ധവിരുദ്ധ പ്രതിഷേധം നടന്നതായി റിപ്പര്‍ട്ട്. ശേഷിക്കുന്ന ബന്ദികളെ തിരികെ കൊണ്ടുവരണമെന്നും പ്രതിഷേധക്കാര്‍ ആവശ്യപ്പെട്ടു. ഹോസ്‌റ്റേജസ് ആന്‍ഡ് മിസ്സിംഗ് ഫാമിലീസ് ഫോറത്തിന്റെ കണക്കനുസരിച്ച് 30,000 പേര്‍ പ്രതിഷേധത്തില്‍ പങ്കെടുത്തതായി ടൈംസ് ഓഫ് ഇസ്രാഈല്‍ റിപ്പോര്‍ട്ട് ചെയ്യുന്നു. ‘അവരെ വീട്ടിലേക്ക് കൊണ്ടുവരിക’ എന്ന് എഴുതിയ ബന്ദികളുടെ ചിത്രങ്ങള്‍ പ്രദര്‍ശിപ്പിക്കുന്ന ബോര്‍ഡുകളും യുഎസ് പ്രസിഡന്റ് ഡൊണാള്‍ഡ് ട്രംപ് ഇടപെട്ട് യുദ്ധം അവസാനിപ്പിക്കണമെന്ന് ആവശ്യപ്പെടുന്ന ബോര്‍ഡുകളുമാണ് പ്രധാനമായും പ്രതിഷേധക്കാര്‍ ഉയര്‍ത്തിയത്.
ഗസ്സയിലെ വംശഹത്യ യുദ്ധം അവസാനിപ്പിക്കുകയും ഇസ്രാഈലി സൈന്യത്തെ പ്രദേശത്ത് നിന്ന് പിന്‍വലിക്കുകയും ഫലസ്തീന്‍ തടവുകാരെ മോചിപ്പിക്കുകയും ചെയ്താല്‍ ഇസ്രാഈലി ബന്ദികളെ മുഴുവനായി മോചിപ്പിക്കാന്‍ തയ്യാറാണെന്ന് ഹമാസ് ആവര്‍ത്തിച്ച് സ്ഥിരീകരിച്ചിട്ടുണ്ട്. എന്നാല്‍ ഇസ്രാഈല്‍ പ്രധാനമന്ത്രി ബെഞ്ചമിന്‍ നെതന്യാഹു ഭാഗികമായ കരാറുകളില്‍ ഉറച്ചുനില്‍ക്കുകയാണ്. ഫലസ്തീന്‍ വിഭാഗങ്ങളുടെ നിരായുധീകരണം ഉള്‍പ്പെടെയുള്ള പുതിയ വ്യവസ്ഥകള്‍ ഏര്‍പ്പെടുത്തി കരാറില്‍ ഒപ്പിടുന്നതില്‍ നിന്ന് നെതന്യാഹു ഒഴിഞ്ഞുമാറുകയും ചെയ്യുന്നു.