ജനീവ: ബോംബാക്രമണത്തിൽ തകർന്നടിയുകയും തരിപ്പണമാവുകയും ചെയ്ത ഗാസയിൽ, അവശിഷ്ടങ്ങൾക്കിടയിൽ കുടുങ്ങിക്കിടക്കുന്ന മൃതദേഹങ്ങളോട് ഇസ്രായേലി സൈന്യം യാതൊരു ആദരവും കാണിക്കുന്നില്ലെന്ന് ഐക്യരാഷ്ട്രസഭ. വൻതോതിൽ ബുൾഡോസറുകൾ ഉപയോഗിച്ച് ഭൂമി നിരപ്പാക്കുന്നതിലൂടെ യുദ്ധക്കുറ്റങ്ങളുടെ തെളിവുകൾ ഇല്ലാതാക്കപ്പെടുകയോ മറച്ചുവെക്കപ്പെടുകയോ ചെയ്യുകയാണെന്ന് യു.എൻ മനുഷ്യാവകാശ മേധാവി വോൾക്കർ ടർക്ക് കടുത്ത ആശങ്ക പ്രകടിപ്പിച്ചു.

ചൊവ്വാഴ്ച പുറപ്പെടുവിച്ച ഔദ്യോഗിക പ്രസ്താവനയിലാണ് ഇസ്രായേലിന്റെ ഭൂമി വെട്ടിത്തെളിക്കൽ നടപടികളെ വോൾക്കർ ടർക്ക് രൂക്ഷമായി വിമർശിച്ചത്.

മൃതദേഹങ്ങൾ പുറത്തെടുക്കുന്നു:

തകർന്ന കെട്ടിടങ്ങളുടെ അവശിഷ്ടങ്ങൾക്കിടയിൽ നിന്ന് മുഴുവൻ കുടുംബങ്ങളുടെയും മൃതദേഹാവശിഷ്ടങ്ങൾ കണ്ടെത്തിയിട്ടുണ്ട്. കൊല്ലപ്പെട്ടവരിൽ ഭൂരിഭാഗവും സ്ത്രീകളും കുട്ടികളുമാണ്.ഗാസയിൽ നിലവിൽ ഏകദേശം 6.1 കോടി ടൺ അവശിഷ്ടങ്ങൾ അടിഞ്ഞുകൂടിയിട്ടുണ്ടെന്നാണ് കണക്ക്. ഇത് നീക്കം ചെയ്യണമെങ്കിൽ തന്നെ ഏഴ് വർഷത്തോളം സമയമെടുക്കുമെന്ന് ഐക്യരാഷ്ട്രസഭ വ്യക്തമാക്കുന്നു.

കാണാതായവർ അയ്യായിരത്തിലധികം:

2025 നവംബറിന് ശേഷം 630-ലധികം മൃതദേഹങ്ങൾ പുറത്തെടുത്തെങ്കിലും ഇപ്പോഴും എണ്ണായിരത്തിലധികം ആളുകൾ തകർന്ന അവശിഷ്ടങ്ങൾക്കടിയിൽ കുടുങ്ങിക്കിടക്കുന്നതായി പലസ്തീൻ സിവിൽ ഡിഫൻസ് വെളിപ്പെടുത്തുന്നു. 2025 ഒക്ടോബറിൽ യു.എസ് മധ്യസ്ഥതയിൽ നിലവിൽ വന്ന വെടിനിർത്തൽ കരാറിന് ശേഷവും ഇസ്രായേലിന്റെ പതിവ് ആക്രമണങ്ങൾ നിലച്ചിട്ടില്ല. കരാറിന് ശേഷം മാത്രം 1,300-ലധികം പലസ്തീനികൾ കൊല്ലപ്പെട്ടിട്ടുണ്ട്.

സാധാരണക്കാരും പോരാളികളും തമ്മിൽ വേർതിരിച്ചറിയാതെ ജനസാന്ദ്രതയേറിയ മേഖലകളിൽ ഇസ്രായേൽ കനത്ത സ്ഫോടകവസ്തുക്കൾ പ്രയോഗിച്ചതാണ് ദുരന്തത്തിന്റെ ആഘാതം വർദ്ധിപ്പിച്ചതെന്ന് വോൾക്കർ ടർക്ക് ചൂണ്ടിക്കാട്ടി. സംഭവത്തിൽ അന്താരാഷ്ട്ര തലത്തിൽ കൃത്യമായ അന്വേഷണം വേണമെന്നും അദ്ദേഹം ആവശ്യപ്പെട്ടു.

അതേസമയം, ഗാസയിലെ വടക്കൻ മേഖലകളിൽ ഇസ്രായേലി സൈന്യം ആക്രമണം തുടരുകയാണ്. ജബാലിയ അഭയാർത്ഥി ക്യാമ്പിൽ വെച്ച് സ്നൈപ്പർ വെടിയേറ്റും, ഗാസ സിറ്റിയിലെ വ്യാവസായിക മേഖലയിൽ ഇസ്രായേലി ഡ്രോൺ ആക്രമണത്തിലും പുതിയതായി പലസ്തീൻ പൗരന്മാർ കൊല്ലപ്പെട്ടതായും റിപ്പോർട്ടുകളുണ്ട്.

un human rights chief uncovers shocking details as israel runs bulldozers over dead bodies in gaza, raising urgent concerns over war crimes and evidence destruction.