നോര്‍വ്വെ ചെസ്സില്‍ ലോക രണ്ടാം നമ്പര്‍ താരമായ അമേരിക്കയുടെ ഹികാരു നകാമുറയെ അട്ടിമറിച്ച ഗുകേഷ് കഴിഞ്ഞ ദിവസം ലോക അഞ്ചാം നമ്പര്‍ താരമായ ഫാബിയാനോ കരുവാനയെയും തോല്‍പിച്ചു. സാധാരണ ക്ലാസിക് ഗെയിമില്‍ ഇരുവരും സമനിലയില്‍ പിരി‍ഞ്ഞതിനെ തുടര്‍ന്ന് കളിച്ച ആമഗെഡോണ്‍ എന്നറിയപ്പെടുന്ന അതിവേഗചെസ്സിലാണ് ഗുകേഷ് ഫാബിയാനോ കരുവാനയെ തറ പറ്റിച്ചത്. ഇതോടെ തുടര്‍ച്ചയായി തോല്‍വികള്‍ ഏറ്റുവാങ്ങിയ ഗുകേഷ് മെല്ലെ വിജയത്തിലേക്ക് ചുവടുവെയ്‌ക്കുകയാണ്.
കഴിഞ്ഞ ദിവസം തന്റെ 19ാം ജന്മദിനത്തിലായിരുന്നു അദ്ദേഹം ലോക രണ്ടാം നമ്പറായ ഹികാരു നകാമുറയെ വീഴ്‌ത്തിയത്. അതേ സമയം രണ്ട് തോല്‍വികള്‍ക്ക് ശേഷം മാഗ്നസ് കാള്‍സന്‍ വന്‍ തിരിച്ചുവരവ് നടത്തി. ക്ലാസിക്ക് ഗെയിമില്‍ തന്നെ ഇന്ത്യയുടെ അര്‍ജുന്‍ എരിഗെയ്സിയെ തോല്‍പിച്ചാണ് മാഗ്നസ് കാള്‍സന്‍ എട്ട് പോയിന്‍റോടെ മുന്നില്‍ എത്തി.
നാലര പോയിന്‍റ് നേടിയ ഗുകേഷ് അഞ്ചാം സ്ഥാനത്താണ്. നാലര പോയിന്‍റ് തന്നെയുള്ള അര്‍ജുന്‍ എരിഗെയ്സി നാലാം സ്ഥാനത്താണ്. ഫാബിയോനോ കരുവാനയും ഹികാരു നകാമുറയും യഥാക്രമം രണ്ടും മൂന്ന് സ്ഥാനങ്ങളില്‍നില്‍ക്കുന്നു.
ഇന്ത്യയുടെ കൊനേരു ഹംപി എഴ് പോയിന്‍റോടെ ഒന്നാം സ്ഥാനത്ത് നില്‍ക്കുന്നു. ഇതിനിടെ ഇന്ത്യയുടെ വൈശാലി ഉക്രൈന്റെ അന്ന മ്യൂസിചുകിനെ അട്ടിമറിച്ചു. ആമഗെഡോണിലായിരുന്നു വൈശാലിയുടെ വിജയം എന്നതിനാല്‍ ഒന്നര പോയിന്‍റേ ലഭിച്ചുള്ളൂ.