കൊച്ചി: ആദിശങ്കര ജയന്തിയോടനുബന്ധിച്ച് ജന്മഭൂമിയും ചിന്മയാ ഇന്റര്നാഷണല് ഫൗണ്ടേഷന് ശോധ് സംസ്ഥാനും സംയുക്തമായി സംഘടിപ്പിക്കുന്ന അന്താരാഷ്ട്ര സെമിനാര് 20ന് പിറവം വെളിയനാട് ആദിശങ്കര ജന്മസ്ഥാന നിലയത്തില് നടക്കും.
ജന്മഭൂമി ഡെപ്യൂട്ടി ജനറല് മനേജര് കെ.എം. ശ്രീദാസും ചിന്മയാ ഇന്റര്നാഷണല് ഫൗണ്ടേഷന് ശോധ് സംസ്ഥാന് ചെയര്പേഴ്സണ് പ്രൊഫ. ഗൗരി മഹുലിക്കറും ചേര്ന്ന് സെമിനാറിന്റെ ബ്രോഷര് പ്രകാശനം ചെയ്തു.
ചിന്മയാ ഇന്റര്നാഷണല് ഫൗണ്ടേഷന് ശോധ് സംസ്ഥാന് ഡയറക്ടര് ഡോ. പി.എന്. സുദര്ശനന്, ചിന്മയാ ഇന്റര്നാഷണല് ഫൗണ്ടേഷന് ശോധ് സംസ്ഥാന് അസി. പ്രൊഫ. ഡോ. ജി. രാജശേഖര റെഡ്ഡി, ജന്മഭൂമി മാനേജര് എന്.എസ്. ബാബു, കെ.കെ. മനോജ്, സി.എന്. ഉണ്ണികൃഷ്ണന് എന്നിവര് പരിപാടിയില് പങ്കെടുത്തു.
20ന് രാവിലെ 9.30ന് സെമിനാര് ഗവര്ണര് രാജേന്ദ്ര വിശ്വനാഥ് ആര്ലേക്കര് ഉദ്ഘാടനം ചെയ്യും. ജന്മഭൂമി എംഡി എം. രാധാകൃഷ്ണന് അദ്ധ്യക്ഷനാകും. അദ്വൈതം ദര്ശന ചിന്തനത്തില് സാമൂഹിക സമരസതയും ഭാരത സംസ്കാരവും, ആഗോള തത്വചിന്തകളുമായുള്ള സൈദ്ധാന്തിക ഇടപെടല് അദ്വൈത ദര്ശനം, ലോകക്രമം, സംഘര്ഷം, അദ്വൈത വ്യാഖ്യാനം എന്നീ വിഷയങ്ങള് പ്രമുഖര് സെമിനാറില് അവതരിപ്പിക്കും.
സെമിനാറിനോടനുബന്ധിച്ച് ഉപന്യാസ രചനാ മത്സരവും നടക്കും. അദ്വൈത വേദാന്തത്തിന്റെ മഹാഗുരുവായ ആദി ശങ്കരാചാര്യരുടെ ചിന്തകളും സന്ദേശങ്ങളും നവതലമുറയിലേക്ക് എത്തിക്കുന്നതിന്റെ ഭാഗമായാണ് ഈ മത്സരം. മികച്ച ലേഖനത്തിന് 5000 രൂപയും രണ്ടാമത്തെ ലേഖനത്തിന് 2500 രൂപ വീതവും നല്കും. ഫലകവും പ്രശസ്തി പത്രവും പുരസ്കാരമായി കൈമാറും. പങ്കെടുക്കുന്ന എല്ലാ മത്സരാര്ത്ഥികള്ക്കും സര്ട്ടിഫിക്കറ്റും നല്കും. തെരഞ്ഞെടുക്കപ്പെടുന്ന ലേഖനങ്ങള് ജന്മഭൂമിയില് പ്രസിദ്ധീകരിക്കും.
സംഘര്ഷങ്ങള്ക്കിടയിലെ പുതിയ ലോകക്രമം- ശങ്കരദര്ശനവും ഭാരതവും ലോകസമാധാനവും, അദ്വൈതം- സാമൂഹിക ഐക്യത്തിനും സുസ്ഥിര ഭാവിക്കുമായി ഭാരതത്തിന്റെ സന്ദേശം എന്നീ വിഷയങ്ങളിലാണ് ലേഖനം എഴുതേണ്ടത്. പരമാവധി 4 പേജില് കവിയരുത്. മലയാള ഭാഷയില് കൈയെഴുത്തിലോ ഡിടിപി രൂപത്തിലോ ലേഖനം സമര്പ്പിക്കാം, പ്രായപരിധിയില്ല. മത്സരാര്ത്ഥിയുടെ പേര്, വിലാസം, ഫോണ് നമ്പര് എന്നിവ ലേഖനത്തോടൊപ്പം നിര്ബന്ധമായും ഉള്പ്പെടുത്തണം. സ്വതന്ത്രമായ രചനയായിരിക്കണം, പകര്ത്തലുകള് അനുവദനീയമല്ല. മേല്പ്പറഞ്ഞ വിഷയത്തില് ഒരാള്ക്ക് ഒരു വിഷയത്തില് മാത്രമേ ലേഖനം സമര്പ്പിക്കാന് സാധിക്കൂ. അവസാന തീയതി ഏപ്രില് 15. ഓണ്ലൈന് രജിസ്ട്രേഷന് ആണ്. സെമിനാറില് പ്രതിനിധിയായി പങ്കെടുക്കാനും ലേഖനങ്ങള് അയക്കാനും 9495820669, 9447763828, 8281900551, 9349843811 എന്നീ വാട്ട്സ്ആപ്പ് നമ്പറുകളില് ബന്ധപ്പെടുക.