ശ്രീനഗര്‍: ജമ്മു കശ്മീരില്‍ ഭീകരാക്രണത്തില്‍ ഡോക്ടറടക്കം ആറു പേര്‍ കൊല്ലപ്പെട്ടു. മരിച്ചവരില്‍ അഞ്ചുപേര്‍ അതിഥി തൊഴിലാളികളാണ്.
സോനംമാര്‍ഗിലെ തുരങ്ക പാത നിര്‍മ്മാണത്തിനായി എത്തിയ തൊഴിലാളികളെയാണ് ഭീകരര്‍ വെടിവെച്ച് കൊന്നത്. ഭീകരര്‍ക്കായി സുരക്ഷാ സേന തെരച്ചില്‍ ഊര്‍ജിതമാക്കി. ആക്രമണത്തെ കേന്ദ്രമന്ത്രി നിതിന്‍ ഗഡ്കരിയും ജമ്മു കശ്മീര്‍ മുഖ്യമന്ത്രി ഒമര്‍ അബ്ദുള്ളയും അപലപിച്ചു.
സുപ്രധാന നിര്‍മാണ പ്രവര്‍ത്തിക്കിടെ തൊഴിലാളികളെ ഭീകരര്‍ കൊലപ്പെടുത്തിയത് ഞെട്ടിപ്പിക്കുന്നതാണെന്ന് നിതിന്‍ ഗഡ്കരി പറഞ്ഞു. മരിച്ച തൊഴിലാളികളുടെ കുടുംബാംഗങ്ങളുടെ ദുഖത്തില്‍ പങ്കുചേരുകയാണെന്നും പരിക്കേറ്റവരുടെ ആരോഗ്യനില വേഗം മെച്ചപ്പെടാന്‍ പ്രാര്‍ത്ഥിക്കുകയാണെന്നും മന്ത്രി എക്‌സില്‍ കുറിച്ചു. ആക്രമണത്തെ അപലപിച്ച കേന്ദ്ര ആഭ്യന്തര മന്ത്രി അമിത് ഷാ ഭീകരര്‍ക്കെതിരെ കടുത്ത നടപടി ഉണ്ടാകുമെന്ന് വ്യക്തമാക്കി.