ഇസ്ലാമാബാദ്: ഐസിസി ട്വന്റി-20 ക്രിക്കറ്റ് ലോകകപ്പില് ഇന്ത്യയുമായി കളിക്കില്ലെന്ന് പാകിസ്ഥാന്. ഈ മാസം 15ന് കൊളൊംബോയിലെ പ്രേമദാസ സ്റ്റേഡിയത്തിലാണ് ഇന്ത്യ-പാകിസ്ഥാന് മത്സരം നിശ്ചയിച്ചിരിക്കുന്നത്. പാകിസ്ഥാന് സര്ക്കാര് ആണ് ഇന്ത്യയുമായി കളിക്കേണ്ടതില്ലെന്ന പ്രഖ്യാപനം നടത്തിയത്.
എന്നാല് ലോകകപ്പിലെ മറ്റ് മത്സരങ്ങളില് കളിക്കുമെന്നാണ് പാകിസ്ഥാന് ക്രിക്കറ്റ് ബോര്ഡ് അറിയിച്ചത്.പാകിസ്ഥാന്റെ എല്ലാ മത്സരങ്ങളും ശ്രീലങ്കയിലാണ് നിശ്ചയിച്ചിരിക്കുന്നത്.
ലോകക്കപ്പില് നിന്ന് പിന്മാറിയ ബംഗ്ലാദേശിന് പിന്തുണ പ്രഖ്യാപിച്ചാണ് പാകിസ്ഥാന് ഇന്ത്യയുമായി കളിക്കില്ലെന്ന് അറിയിച്ചത്.ഷേക്ക് ഹസീന സര്ക്കാരിനെ പുറത്താക്കി മതമൗലിക വാദികള്ക്ക് സ്വാധീനമുളള ഭരണകൂടം അധികാരത്തിലെത്തിയതോടെ ഇന്ത്യയോട് ശത്രുതാപരമായ നിലപാടാണ് ബംഗ്ലാദേശ് സ്വീകരിച്ച് വരുന്നത്.ബംഗ്ലാദേശിന്റെ മത്സരങ്ങള് ശ്രീലങ്കയിലേക്ക് മാറ്റണമെന്ന് അവര് ആവശ്യപ്പെട്ടെങ്കിലും ഐ സി സി വഴങ്ങിയില്ല.ഇതോടെ ബംഗ്ലാദേശ് ലോകകപ്പില് നിന്ന് പിന്മാറുകയായിരുന്നു.ബംഗ്ലാദേശിന് പകരം സ്കോട്ലന്ഡ് ലോകകപ്പില് കളിക്കും.
ബംഗ്ലാദേശിനെ ഒഴിവാക്കിയതിലാണ് പാക് പ്രതിഷേധം. തങ്ങളുടെ മത്സരങ്ങള് ശ്രീലങ്കയിലേക്ക് മാറ്റണമെന്ന ബംഗ്ലാദേശിന്റെ ആവശ്യം ഐസിസി തള്ളിയിരുന്നു. തുടര്ന്ന് ബംഗ്ലാദേശ് പിന്മാറുകയും പകരമായി സ്കോട്ലന്ഡിനെ ഉള്പ്പെടുത്തുകയും ചെയ്തിരുന്നു.
അതേസമയം, അണ്ടര് 19 ലോകകപ്പ് സൂപ്പര് സിക്സില് പാകിസ്ഥാനെ തകര്ത്ത് ഇന്ത്യ സെമിയിലെത്തിയതും ഇന്നാണ്.