മൂന്നാറില്‍ കെഎസ്ആര്‍ടിസി ഡബിള്‍ ഡക്കര്‍ ബസ് അപകടത്തില്‍പ്പെട്ട സംഭവത്തില്‍ ബസ് ഡ്രൈവറെ കെഎസ്ആര്‍ടിസി സസ്‌പെന്‍ഡ് ചെയ്തു. ഡ്രൈവര്‍ മുഹമ്മദ് കെ.പിയുടെ ഭാഗത്ത് ഗുരുതര വീഴ്ച ഉണ്ടായെന്നാണ് കണ്ടെത്തല്‍.
എതിരെ വന്ന കാറിന്റെ അമിതവേഗമാണ് അപകടകാരണമെന്നാണ് ഡ്രൈവര്‍ ആദ്യം പറഞ്ഞിരുന്നത്. എന്നാല്‍ എതിരെയൊരു വാഹനം ഉണ്ടായിരുന്നില്ലെന്ന് സിസിടിവി ദൃശ്യങ്ങളില്‍ ബോധ്യപ്പെട്ടു. കഴിഞ്ഞ വെള്ളിയാഴ്ച ചിന്നക്കനാല്‍ നിന്ന് സഞ്ചാരികളുമായി പോകുന്നതിനിടെയാണ് അപകടമുണ്ടായത്. ദേശീയപാതയോരത്തെ ബസ് കാത്തിരിപ്പ് കേന്ദ്രം തകര്‍ത്ത ശേഷം ബസ് സമീപത്തെ കാനയില്‍ ഇടിച്ചുനിന്നു. യാത്രക്കാര്‍ക്ക് പരുക്കേല്‍ക്കാതെ രക്ഷപ്പെട്ടു. ബസില്‍ 45 യാത്രക്കാരുണ്ടായിരുന്നു. വിനോദസഞ്ചാരികളെ മറ്റൊരു ബസില്‍ മൂന്നാറിലെത്തിക്കുകയായിരുന്നു.