കൊച്ചി : തെലങ്കാന മുഖ്യമന്ത്രി രേവന്ത് റെഡ്ഡിയെ ‘ ഡാഷ് മോനേ ‘ എന്നുള്ള മുഖ്യമന്ത്രി പിണറായി വിജയന്റെ പരാമർശത്തിന് പിന്തുണ അറിയിച്ച് നടി മാല പാർവതി . രേവന്ത് റെഡ്ഡിക്ക് മുഖ്യമന്ത്രി നൽകിയ മറുപടി ഉചിതമാണെന്നും കേരളത്തിന്റെ അന്തസ്സ് അദ്ദേഹം ഉയർത്തിപ്പിടിച്ചെന്നും മാല പാർവതി ഫേസ്ബുക്ക് പോസ്റ്റിൽ പറഞ്ഞു.

‘ തെലുങ്കാന മുഖ്യമന്ത്രി,കേരള മുഖ്യമന്ത്രിയ്‌ക്കയച്ച ഔദ്യോഗിക കത്തിൽ “പോ മോനെ ” എന്ന് അപമാനിച്ചതിന് ഇത് തന്നെയാണ് മറുപടി ! C.M കേരളത്തിന്റെ മാനം കാത്തു !
പിന്നല്ലാതെ ! ‘ എന്നാണ് മാലാപാർവതിയുടെ പോസ്റ്റ് .

തെരഞ്ഞെടുപ്പ് പ്രചാരണത്തിനിടെ രേവന്ത് റെഡ്ഡി ‘ നീ പോ മോനേ വിജയാ‘ എന്ന് പറഞ്ഞതിനെ കുറിച്ച് പിണറായിയോട് മാധ്യമപ്രവർത്തകർ ചോദ്യം ഉന്നയിച്ചിരുന്നു. അതിനു മറുപടി എന്ന നിലയിലാണ് ‘ഡാഷ് മോനേ രേവന്ത, മറുപടി വരുന്നു’ എന്ന് മുഖ്യമന്ത്രി പറഞ്ഞത്. മുഖ്യമന്ത്രി പദവി വഹിക്കുന്ന ഒരാൾ ചില പെരുമാറ്റ നിലവാരം പാലിക്കണമെന്നും, തന്റെ പ്രവർത്തനങ്ങൾ അതിനോട് യോജിക്കുന്നുണ്ടോ എന്ന് രേവന്ത് ചിന്തിക്കണമെന്നും പിണറായി പറഞ്ഞിരുന്നു.

രേവന്ത് റെഡ്ഡി പരസ്യമായി ആരോപണങ്ങൾ ഉന്നയിച്ചതിനാൽ അദ്ദേഹത്തിനും മറുപടി നൽകേണ്ടിവരുമെന്ന് മുഖ്യമന്ത്രി പറഞ്ഞു. എങ്കിലും, ഇപ്പോൾ വിശദമായ പ്രതികരണം നൽകുന്നില്ലെന്നും പിണറായി പറഞ്ഞിരുന്നു.