ബെംഗളുരു: കന്നഡ ഭാഷയുടെ ഉത്ഭവത്തെക്കുറിച്ചുള്ള തന്റെ സമീപകാല പ്രസ്താവനകൾക്കെതിരെ വ്യാപകമായ പ്രതിഷേധം ഉയർന്നതിനെത്തുടർന്ന്, തഗ് ലൈഫ് എന്ന സിനിമയുടെ റിലീസ് ഉറപ്പാക്കാൻ നിർദ്ദേശം നൽകണമെന്ന് ആവശ്യപ്പെട്ട് നടൻ കമൽഹാസൻ കർണാടക ഹൈക്കോടതിയെ സമീപിച്ചു.
ജൂൺ 5 ന് റിലീസ് ചെയ്യാൻ തീരുമാനിച്ചിരിക്കുന്ന ചിത്രം ബഹിഷ്കരിക്കാൻ കർണാടക ഫിലിം ചേംബർ ഓഫ് കൊമേഴ്‌സ് അടുത്തിടെ തീരുമാനിച്ചതിനെ തുടർന്നാണിത്. ഫിലിം ചോംബറിന്റെ പ്രവർത്തി നിയമ വിരുദ്ധമാണെന്ന് രാജ് കമൽ ഇന്‍റർനാഷണൽ കോടതിയിൽ സമർപ്പിച്ച ഹർജിയിൽ പറയുന്നു. “കന്നഡ തമിഴിൽ നിന്നാണ് ജനിച്ചത്” എന്ന് ഒരു പ്രമോഷണൽ പരിപാടിക്കിടെ കമൽഹാസൻ പറഞ്ഞതായി റിപ്പോർട്ടുകൾ വന്നതിനെ തുടർന്നാണ് കർണാടകയിൽ ചിത്രത്തിന്റെ പ്രദർശനം ‘നിരോധിക്കാൻ’ തീരുമാനിച്ചത്.
കമലിന്റെ പരാമർശം കന്നഡ ഭാഷയെ അപമാനിക്കുന്നതാണെന്നും സ്വന്തം ഭാഷയെ പുകഴ്‌ത്താൻ മറ്റു ഭാഷയെ തരം താഴ്‌ത്തരുതെന്നും കർണാടക ബിജെപി പ്രസിഡന്‍റ് ബി. വിജയേന്ദ്ര വിമർശിച്ചിരുന്നു. കമലഹാസൻ തന്റെ പരാമർശത്തിന് ക്ഷമാപണം നടത്തിയില്ലെങ്കിൽ ചിത്രം കർണാടകയിൽ പ്രദർശിപ്പിക്കില്ലെന്ന് കെ.എഫ്.സി.സി. പ്രഖ്യാപിച്ചു.