തൃശൂര്: തിരൂര് തുഞ്ചന്പറമ്പില് എം.ടി. വാസുദേവന് നായരുടെ സ്മാരകം നിര്മ്മിക്കുന്നതിനെതിരെ അഖില കേരള എഴുത്തച്ഛന് സമാജം. തുഞ്ചന്പറമ്പ് എഴുത്തച്ഛന്റെ സ്മാരകമാണ്. എം.ടി.യോടുള്ള എല്ലാ ആദരവും നിലനില്ക്കെ തന്നെ തുഞ്ചന്പറമ്പില് അദ്ദേഹത്തിന്റെ സ്മാരകം നിര്മ്മിക്കുന്നതിനെ അനുകൂലിക്കാനാകില്ല. എംടിക്ക് സ്മാരകം വേണമെങ്കില് അതിന് ഉചിതമായ സ്ഥലം സര്ക്കാര് കണ്ടെത്തണം. തുഞ്ചന്പറമ്പ് എഴുത്തച്ഛന്റെ സ്മാരകമായി സംരക്ഷിക്കണമെന്നും സമാജം ഭാരവാഹികള് ആവശ്യപ്പെട്ടു. ചിറ്റൂരിലെ തുഞ്ചന് മഠവും സര്ക്കാരിന്റെ അവഗണന നേരിടുകയാണ്. സംസ്ഥാന പ്രസിഡണ്ട് അഡ്വ. പി.ആര്. സുരേഷ് പറഞ്ഞു.
കേരളം ഭരിച്ച രണ്ടു മുന്നണികളും എഴുത്തച്ഛന് സമുദായത്തെ അവഗണിച്ചതായി സമാജം ഭാരവാഹികള് വാര്ത്താ സമ്മേളനത്തില് പറഞ്ഞു. തെരഞ്ഞെടുപ്പ് അടുത്തിരിക്കുന്ന വേളയില് എഴുത്തച്ഛന് സമുദായത്തിന് അര്ഹമായ പരിഗണന ലഭിക്കണം. 15 ലക്ഷത്തോളം വരുന്ന സമുദായ അംഗങ്ങള് 20 ലേറെ നിയമസഭാ സീറ്റുകളില് നിര്ണായകശക്തിയാണെന്നും സമാജം ഭാരവാഹികള് പറഞ്ഞു. മുന്നണികള് തങ്ങളെ വിശ്വാസത്തിലെടുത്തില്ലെങ്കില് തെരഞ്ഞെടുപ്പില് സ്ഥാനാര്ഥികളെ നിര്ത്തുന്ന കാര്യം ആലോചിക്കും.
അഖില കേരള എഴുത്തച്ഛന് സമാജം സംസ്ഥാന സമ്മേളനത്തിന്റെ ഭാഗമായ പൊതുസമ്മേളനം 28ന് വൈകിട്ട് നാലിന് തൃശൂര് തെക്കേഗോപുര നടയില് നടക്കും. സമാജം രക്ഷാധികാരികളായ അഡ്വ. എം.എ. കൃഷ്ണനുണ്ണിയും ടി.ജി. രവിയും ചേര്ന്ന് ഉദ്ഘാടനം ചെയ്യും. രമേശ് ചെന്നിത്തല മുഖ്യാതിഥിയാകും. സി.പി.എം ജില്ലാ സെക്രട്ടറി കെ.വി. അബ്ദുള് ഖാദര്, ബിജെപി സിറ്റി ജില്ലാ പ്രസിഡന്റ് ജസ്റ്റിന് ജേക്കബ് എന്നിവര് സംസാരിക്കും. 28ന് വൈകീട്ട് നാലിന് തൃശൂര് നഗരം ചുറ്റിയുള്ള പ്രകടനത്തിന് ശേഷമാകും പൊതുസമ്മേളനം നടക്കുക.
വാര്ത്താസമ്മേളനത്തില് സമാജം സംസ്ഥാന പ്രസിഡന്റ് അഡ്വ. പി.ആര്. സുരേഷ്, ജനറല് സെക്രട്ടറി വി.എ. രവീന്ദ്രന്, രക്ഷാധികാരി അഡ്വ. എം.എ. കൃഷ്ണനുണ്ണി, സൊസൈറ്റി സെക്രട്ടറി സി.എന്. സജീവന്, വൈസ് പ്രസിഡന്റുമാരായ കെ.ജി. അരവിന്ദാക്ഷന്, പി.എസ്. ജയഗോപാലന്, സുരേഷ് വേലായുധന്, സി.കെ. ബാലന്, എച്ച്.ആര്.ഡി സൊസൈറ്റി ജോ. സെക്രട്ടറി അഡ്വ. എന്. സന്തോഷ്, ട്രഷറര് എം.എന്. ശശികുമാര്, ജില്ലാ പ്രസിഡന്റ് കെ.കെ. ജയറാം, ജില്ലാ സെക്രട്ടറി ജയകൃഷ്ണന് ടി. മേപ്പുള്ളി എന്നിവര് പങ്കെടുത്തു.