തൃശൂര്‍: കെട്ടിടം തകര്‍ന്ന് അതിഥി തൊഴിലാളികള്‍ മരിച്ചതില്‍ അന്വേഷണത്തിന് ജില്ലാ കളക്ടറുടെ ഉത്തരവ്. സംഭവം വിവിധ വകുപ്പുകള്‍ അന്വേഷിക്കും.ഏകോപനത്തിനായി തദ്ദേശ സ്വയംഭരണ വകുപ്പ് ജോയിന്റ് ഡയറക്ടറെ നിയോഗിച്ചു.
തൊഴിലാളികളുടെ മൃതദേഹങ്ങള്‍ പോസ്റ്റ്‌മോര്‍ട്ടത്തിന് ശേഷം ബന്ധുക്കള്‍ക്ക് കൈമാറി.അതിഥി തൊഴിലാളികള്‍ താമസിക്കുന്ന മറ്റ് കെട്ടിടങ്ങളും സുരക്ഷിതമല്ലാത്ത ലേബര്‍ ക്യാമ്പുകളും അന്വേഷണ പരിധിയില്‍ ഉള്‍പ്പെടുത്തും.
അപകടം സംബന്ധിച്ച് പൊലീസ്, കൊടകര പഞ്ചായത്ത്, തൊഴില്‍ വകുപ്പ് എന്നിവ അന്വേഷണം നടത്തും.കെട്ടിടം തകര്‍ന്ന് മരിച്ച പശ്ചിമ ബംഗാള്‍ മാള്‍ഡ സ്വദേശികളായ റാബുള്‍ ഇസ്ലാം, അബ്ദുള്‍ ആലിഫ്, റാബുള്‍ മാനാന്‍ എന്നിവരുടെ മൃതദേഹങ്ങള്‍ അടുത്ത ദിവസം നാട്ടിലെത്തിക്കും.വിമാനമാര്‍ഗം നാട്ടിലെത്തിക്കുന്ന മൃതദേഹങ്ങള്‍ക്കൊപ്പം ബന്ധുവിനും സുഹൃത്തുക്കള്‍ക്കം പോകുന്നതിനുള്ള സൗകര്യങ്ങള്‍ ഒരുക്കും.
കൊടകര പഞ്ചായത്തിന് സമീപമുളള കാലപ്പഴക്കം ചെന്ന ഇരുനില കെട്ടിടമാണ് രാവിലെ ആറുമണിയോടെ തകര്‍ന്നുവീണത്. സംഭവ സമയം കെട്ടിടത്തില്‍ 17 അതിഥി തൊഴിലാളികള്‍ ഉണ്ടായിരുന്നു. കെട്ടിടം വീഴുന്ന ശബ്ദം കേട്ട് 14 പേര്‍ പുറത്തേക്ക് ഓടിയതിനാല്‍ ഇവര്‍ പരിക്കേല്‍ക്കാതെ രക്ഷപ്പെട്ടു.
കെട്ടിടം തകര്‍ന്ന് അവശിഷ്ടങ്ങള്‍ക്കിടയില്‍ കുടുങ്ങിയ തൊഴിലാളികളെ ജെ സി ബികള്‍ എത്തിച്ച് ഏറെ പരിശ്രമിച്ചാണ് പുറത്തെടുത്തതെങ്കിലും ജീവന്‍ രക്ഷിക്കാനായില്ല. മരിച്ചവരുടെ കുടുംബത്തിന് നഷ്ടപരിഹാരം നല്‍കുമെന്ന് കളക്ടര്‍ അര്‍ജുന്‍ പാണ്ഡ്യന്‍ അറിയിച്ചു.തകര്‍ന്ന കെട്ടിടത്തിന്റെ കാലപ്പഴക്കം സംബന്ധിച്ച് പരിശോധന നടത്തി നടപടി സ്വീകരിക്കുമെന്നും അദ്ദേഹം അറിയിച്ചു.