ന്യൂദൽഹി: കേന്ദ്ര സർക്കാർ ജീവനക്കാർക്കും പെൻഷൻകാർക്കും ദീപാവലിക്ക് മുൻപ് ആശ്വാസമായി ക്ഷാമബത്ത (ഡിഎ) 3 ശതമാനം വർധിപ്പിക്കാൻ പ്രധാനമന്ത്രി നരേന്ദ്ര മോദിയുടെ അധ്യക്ഷതയിൽ ചേർന്ന കേന്ദ്ര മന്ത്രിസഭാ യോഗം അനുമതി നൽകി. ജൂലൈ 1, 2026 മുതൽ മുൻകാല പ്രാബല്യത്തോടെയാണ് വർധന നടപ്പാക്കുക. ഇതോടെ കേന്ദ്ര സർക്കാർ ജീവനക്കാരുടെ ഡിഎ 60 ശതമാനത്തിൽനിന്ന് 63 ശതമാനമായി ഉയരും. പെൻഷൻകാർക്കുള്ള ക്ഷാമാശ്വാസവും (ഡിആർ) 3 ശതമാനം വർധിപ്പിച്ചിട്ടുണ്ട്.

48.54 ലക്ഷം കേന്ദ്ര സർക്കാർ ജീവനക്കാർക്കും 68.71 ലക്ഷം പെൻഷൻകാർക്കും ഉൾപ്പെടെ 1.16 കോടിയിലധികം പേർക്ക് തീരുമാനത്തിന്റെ പ്രയോജനം ലഭിക്കുമെന്ന് കേന്ദ്രമന്ത്രി അശ്വിനി വൈഷ്ണവ് അറിയിച്ചു.

പണപ്പെരുപ്പത്തിന്റെ ആഘാതം കുറയ്‌ക്കുന്നതിനായി കേന്ദ്ര സർക്കാർ വർഷത്തിൽ രണ്ടുതവണയാണ് ക്ഷാമബത്തയും ക്ഷാമാശ്വാസവും പരിഷ്കരിക്കുന്നത്. ജനുവരി, ജൂലൈ മാസങ്ങളിലാണ് സാധാരണയായി വർധന പ്രഖ്യാപിക്കുന്നത്. ഏഴാം ശമ്പള കമ്മിഷന്റെ ശുപാർശകളെ അടിസ്ഥാനമാക്കിയുള്ള അംഗീകൃത ഫോർമുല പ്രകാരമാണ് ഇത്തവണയും വർധന അനുവദിച്ചിരിക്കുന്നത്.

പുതിയ നിരക്ക് ജൂലൈ 1 മുതൽ പ്രാബല്യത്തിൽ വരുന്നതിനാൽ ജീവനക്കാർക്ക് ജൂലൈ മുതൽ ലഭിക്കേണ്ട കുടിശ്ശികയും ലഭിക്കും. വർധനയോടെ ജീവനക്കാരുടെ ശമ്പളത്തിലും പെൻഷൻകാർക്ക് ലഭിക്കുന്ന തുകയിലും വർധനയുണ്ടാകും.

കണ്ടെയ്‌നർ നിർമാണ പ്രോത്സാഹന പദ്ധതിക്കും അംഗീകാരം

രാജ്യത്തെ ആഭ്യന്തര ഉൽപ്പാദനം പ്രോത്സാഹിപ്പിക്കുന്നതിനായി 10,000 കോടി രൂപയുടെ കണ്ടെയ്‌നർ നിർമാണ പ്രോത്സാഹന പദ്ധതിക്കും കേന്ദ്ര മന്ത്രിസഭ അംഗീകാരം നൽകി.

പലിശ ഇളവ്, പരിശോധനയ്‌ക്കും സർട്ടിഫിക്കേഷനുമുള്ള സഹായം, ഭൂമി പാട്ടത്തിനെടുക്കുന്നതിനുള്ള പിന്തുണ, പ്രവർത്തനച്ചെലവിനുള്ള സഹായം എന്നിങ്ങനെ നാല് ഘടകങ്ങളാണ് പദ്ധതിയിലുള്ളത്.

പദ്ധതിയുടെ ഭാഗമായി പുതിയ നിർമാണ യൂണിറ്റുകൾക്കും നിലവിലുള്ള യൂണിറ്റുകളുടെ ശേഷി വർധിപ്പിക്കുന്നതിനും പിന്തുണ നൽകും. പ്രാഥമിക അംഗീകാരം ലഭിച്ച് മൂന്ന് വർഷത്തിനുള്ളിൽ നിശ്ചിത ഉൽപ്പാദനശേഷി കൈവരിക്കുകയും ആഗോള നിലവാരത്തിലുള്ള കണ്ടെയ്‌നറുകൾ നിർമിക്കുകയും വേണമെന്നാണ് വ്യവസ്ഥ.

പുതിയ യൂണിറ്റുകൾക്ക് പ്രതിവർഷം കുറഞ്ഞത് ഒരു ലക്ഷം ടിഇയു (TEU — ഇരുപത് അടി നീളമുള്ള കണ്ടെയ്‌നറിന് തുല്യമായ അളവുകോൽ) ശേഷിയും നിലവിലുള്ള യൂണിറ്റുകളുടെ വികസനത്തിന് കുറഞ്ഞത് 25,000 ടിഇയു ശേഷിയും നിർദേശിച്ചിട്ടുണ്ട്.