തിരുവനന്തപുരം: ദേശീയ സുരക്ഷാ ഉപദേഷ്ടാവ് അജിത് ദോവല്‍ തിരുവനന്തപുരത്തെത്തിയതായി വാര്‍ത്ത. തുമ്പ വി എസ് എസ് സിയിലെത്തി അദ്ദേഹം ശാസ്ത്രജ്ഞരുമായി കൂടിക്കാഴ്ച നടത്തി.

പി എസ് എല്‍ വി തുടര്‍ പരാജയങ്ങള്‍ അന്വേഷിക്കാന്‍ ആണ് അജിത് ദോവല്‍ തിരുവനന്തപുരത്തെത്തിയത്. പ്രധാനമന്ത്രി നരേന്ദ്രമോദിയുടെ നിര്‍ദ്ദേശാനുസരണമാണ് സന്ദര്‍ശനം എന്നാണ് വിവരം. പി എസ് എല്‍ വി പരാജയങ്ങളില്‍ അട്ടിമറിയില്ലെന്നാണ് വിലയിരുത്തല്‍. വീഴ്ചയുടെ കാരണങ്ങള്‍ എന്താണെന്നതു സംബന്ധിച്ചുള്ള വിലയിരുത്തലുകള്‍ നടത്തി. പിഎസ്എല്‍വിയുടെ പരാജയങ്ങളെക്കുറിച്ച് അന്വേഷണം നടത്താറുണ്ടെങ്കിലും ദേശീയ സുരക്ഷാ ഉപദേഷ്ടാവ് നേരിട്ടെത്തുന്നത് ആദ്യമാണ്.

ന്യൂദല്‍ഹിയില്‍ മടങ്ങിയെത്തിയ അജിത് ദോവല്‍ അന്വേഷണ റിപ്പോര്‍ട്ടും സമര്‍പ്പിച്ചെന്നാണ് അറിയുന്നത്.

ജനുവരി 12 ന് ശ്രീഹരിക്കോട്ടയില്‍ നിന്നും വിക്ഷേപിച്ച പി.എസ്.എല്‍.വി സി 62 ദൗത്യം വിക്ഷേപണ പാതയില്‍ നിന്നും വ്യതിചലിച്ച് നിയന്ത്രണം നഷ്ടമായിരുന്നു. തുടര്‍ച്ചയായി രണ്ടാം തവണയാണ് ഐ.എസ്.ആര്‍.ഒയുടെ പി.എസ്.എല്‍വി ദൗത്യം പരാജയപ്പെട്ടത്. വിദേശ രാജ്യങ്ങളുടെ ഉപഗ്രഹങ്ങളടക്കം റോക്കറ്റിലുണ്ടായിരുന്നു.

2025 മേയ് 18ന് വിക്ഷേപിച്ച പി.എസ്.എല്‍.വി-സി 61 ദൗത്യവും പരാജയമായിരുന്നു.