“മനോഹരി രാധേ രാധേ…” — ഈ ഭജനതാളത്തിലുള്ള ഗാനത്തിന്റെ മാധുര്യം കേൾക്കാത്ത മലയാളി എത്രയുണ്ട്? കഴിഞ്ഞ കുറച്ച് വർഷങ്ങളായി മലയാളികളുടെ ഹൃദയത്തിൽ ഭക്തിയും സംഗീതവും ചേർന്നൊരു പുതിയ അനുഭവമായി നിറഞ്ഞുനിൽക്കുകയാണ് നന്ദഗോവിന്ദം ഭജൻസ്. 25 വർഷങ്ങൾക്കു മുമ്പ് കോട്ടയത്തെ നട്ടാശ്ശേരിയിൽ ചെറുപ്പക്കാരുടെ ഒരു കൂട്ടായ്‌മയായി ആരംഭിച്ച ഈ സംഘത്തിന്റെ ശബ്ദം, ഇന്ന് കേരളത്തിൽ നിന്നു യുഎഇയിലേക്കും കാനഡയിലേക്കും വ്യാപിച്ചു.

സംഘത്തിന്റെ തുടക്കം സാധാരണമായിരുന്നു — ശ്രീദുർഗ്ഗ ഭജനസമിതി എന്ന പേരിൽ രാജേന്ദ്ര പണിക്കർ ആരംഭിച്ച ഈ കൂട്ടായ്‌മ പിന്നീട് “നന്ദഗോവിന്ദം ഭജൻസ്” ആയി പരിണമിച്ചു. നാട്ടിലെ ക്ഷേത്രമുറ്റങ്ങളിലായിരുന്നു ആദ്യ അവതരണങ്ങൾ. കാലക്രമേണ സംഗീതമനസ്സുള്ള യുവാക്കളുടെ കൂട്ടായ്‌മയായി അത് വളർന്നു. സാമ്പ്രദായിക ഭജന രീതികളിൽനിന്ന് വ്യത്യസ്തമായ അവതരണമാണ് ഇവരെ വേറിട്ടുനിർത്തിയത്.

സാധാരണ ഭജനകളിൽ ഹാർമോണിയം, തബല തുടങ്ങിയ ഉപകരണങ്ങളാണ് ഉപയോഗിക്കുന്നത്. എന്നാൽ നന്ദഗോവിന്ദം ഭജൻസ് കീബോർഡ്, വയലിനി തുടങ്ങിയ ഉപകരണങ്ങൾ ഉൾപ്പെടുത്തി ഭജനത്തിന് പുതിയ സംഗീതരംഗം സൃഷ്ടിച്ചു. ഭജനയുടെ ആത്മാവിനെ നിലനിർത്തിക്കൊണ്ട് ആധുനിക സംഗീതത്തിന്റെ സ്വാധീനവും അവർ ഉൾപ്പെടുത്തി. അതാണ് മലയാളികളിൽ ഈ സംഘത്തിന്റെ സ്വീകാര്യത ഇരട്ടിയാക്കിയത്.

നന്ദഗോവിന്ദം ഭജൻസിന്റെ യുഎഇ ചാപ്റ്റർ നയിക്കുന്നത് ഗായകൻ നവീൻ ആണ്.  “25 വർഷമായി പ്രവർത്തിച്ചിട്ടും വലിയൊരു ജനശ്രദ്ധ ലഭിച്ചത് കോവിഡ് കാലത്താണ്. സോഷ്യൽ മീഡിയയാണ് ഞങ്ങളെ പുനർജീവിപ്പിച്ചത്.”നവീൻപറയുന്നു 2017-ഓടെ യുഎഇയിൽ ജോലി ചെയ്യവേ നവീനും സംഘാംഗങ്ങളും രാത്രി സമയങ്ങളിൽ പ്രാക്ടീസ് നടത്താൻ തുടങ്ങി. ആ വീഡിയോ ക്ലിപ്പുകൾ സോഷ്യൽ മീഡിയയിൽ പങ്കുവച്ചപ്പോൾ അത് വൈറലായി. അതിലൊന്ന് ആയിരുന്നു പ്രശസ്തമായ മനോഹരി രാധേ രാധേ… എന്ന ഗാനം. അതാണ് അവരുടെ ജീവിതം മാറ്റിമറിച്ചത്.

അതിനുശേഷം നന്ദഗോവിന്ദം ഭജൻസ് “ഭജന കണക്റ്റ്” എന്ന പേരിൽ നിരവധി ലൈവ് പരിപാടികൾ നടത്തി. മലയാളികൾ മാത്രമല്ല, വിദേശത്തുള്ള മലയാളി സമൂഹവും ഇവരെ ഏറ്റെടുത്തു. ഈ സംഘത്തിന്റെ ശക്തി സംഗീതമാത്രമല്ല, പ്രേക്ഷകരുമായുള്ള വൈകാരിക ബന്ധം കൂടിയാണ്. രോഗബാധിതർ, ഒറ്റപ്പെട്ടവർ, വിഷാദരോഗികൾ തുടങ്ങി അനേകർ അവരുടെ പാട്ടുകളിൽ ആത്മസാന്ത്വനം കണ്ടെത്തിയതായി സന്ദേശങ്ങൾ അയക്കാറുണ്ട്. സംഗീതം ജീവിതത്തെ സ്പർശിക്കുന്ന ശക്തിയായി ഇവർ കാണുന്നു.

സിനിമാഗാനങ്ങൾ ഭജന ശൈലിയിലേക്ക് മാറ്റാനുള്ള ധൈര്യമായ പരീക്ഷണമാണ് ഇവരുടെ മറ്റൊരു സവിശേഷത. “മനോഹരി രാധേ രാധേ”ക്ക് ശേഷം കാതലേ കാതലേ പോലുള്ള സിനിമാഗാനങ്ങളും ഭജന ഫ്യൂഷൻ രൂപത്തിൽ അവതരിപ്പിച്ചപ്പോൾ അത് വൈറലായി. ഗാനത്തിന്റെ ആത്മാവിനെ നഷ്ടപ്പെടുത്താതെ ചെറിയ മാറ്റങ്ങൾ മാത്രം വരുത്തി ഭജനയുടെ താളത്തിലേക്ക് കൊണ്ടുവരികയാണ് ഇവരുടെ ശൈലി. “ഒറിജിനൽ ഗാനരചയിതാവിനോടും സംഗീതസംവിധായകനോടും ബഹുമാനത്തോടെ ആ സമീപനം ചെയ്യുന്നു,” നവീൻ പറയുന്നു.

ഇപ്പോൾ നന്ദഗോവിന്ദം ഭജൻസ് കേരളത്തിലും യുഎഇയിലും കാനഡയിലും ഏകദേശം 30-ലധികം അംഗങ്ങളോടെ പ്രവർത്തിക്കുന്നു. എല്ലാവരും പരസ്പരം സഹോദരങ്ങളെപ്പോലെ ബന്ധപ്പെട്ടു നിൽക്കുന്നവരാണ്. ആരംഭകാലത്ത് സ്വന്തം പണത്തിൽ യാത്രകളും പരിപാടികളും നടത്തിയ ഇവർക്ക് ഇപ്പോൾ ആവശ്യമായ പ്രതിഫലവും ലഭിക്കുന്നു. എന്നാൽ സാമ്പത്തിക ലാഭമല്ല ലക്ഷ്യം — ഭക്തിഗാനത്തിന്റെ ആത്മാവാണ് പ്രധാനം.

നന്ദഗോവിന്ദം ഭജൻസിന്റെ ഓരോ പരിപാടിയും ഒരു സംഗീതയാത്രയാണ് — ഭക്തിയുടെയും വികാരത്തിന്റെയും കൂട്ടായ്‌മ. ജനങ്ങളുമായി ഹൃദയബന്ധം പുലർത്തുകയാണ് ഇവരുടെ സംഗീതത്തിന്റെ യഥാർത്ഥ വിജയം. “ഞങ്ങൾ ഒരു ബാൻഡ് മാത്രമല്ല, ഒരു കുടുംബമാണ്,” എന്ന് നവീൻ അഭിമാനത്തോടെ പറയുന്നു.

ഭജനകളെ പുതിയ തലമുറയുടെ സംഗീതരംഗത്ത് പുനരവതരിപ്പിച്ച്, മലയാളികളുടെ മനസ്സിൽ പുതുവൈഭവം തീർത്ത നന്ദഗോവിന്ദം ഭജൻസ്, ഭക്തിഗാനത്തിന്റെ പുതിയ അധ്യായം എഴുതുകയാണ്