ബെംഗളൂരു: ആശുപത്രി ഇല്ലാത്തതിനാൽ പ്രദേശത്തെ ഗർഭിണികൾ ബുദ്ധിമുട്ടുന്നുണ്ടെന്ന് പറഞ്ഞ വനിത മാധ്യമപ്രവര്‍ത്തകയെ ലൈംഗികച്ചുവയോടെ അധിക്ഷേപിച്ച് കോണ്‍ഗ്രസ് എംഎല്‍എ.കര്‍ണാടകയിലെ മുതിര്‍ന്ന നേതാവും ഉത്തര കന്നഡയിലെ ഹാലിയാലിൽ നിന്നുള്ള എംഎൽഎയും മുൻ മന്ത്രിയുമായ ആർവി ദേശ്പാണ്ഡെയാണ് മോശം പരാമർശം നടത്തിയത്.
ഉത്തര കന്നഡയിലെ ജോയ്‌ഡ താലൂക്കിലെ ആശുപത്രി സൗകര്യങ്ങളുടെ അഭാവത്തിൽ ഗർഭിണികൾ ബുദ്ധിമുട്ടുന്നുണ്ടെന്ന പറഞ്ഞ മാധ്യമ പ്രവർത്തകയോട് ‘നിനക്കൊരു കുട്ടിയുണ്ടാകേണ്ടസമയത്ത്, ഞാന്‍ നിനക്കത് ചെയ്തുതരാം’ എന്നായിരുന്നു മറുപടി.അമ്പരന്നുപോയ മാധ്യമപ്രവർത്തക വിശദീകരണം ആവശ്യപ്പെട്ടപ്പോൾ എംഎൽഎ തന്റെ പരാമർശം ആവർത്തിക്കുകയാണുണ്ടായത്.
വനിതാ മാധ്യമ പ്രവർത്തകയോടുള്ള ദേശ്പാണ്ഡെയുടെ പരാമർശത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുകയും കടുത്ത വിമർശനത്തിനിടയാക്കുകയും ചെയ്തു.മുതിർന്ന എംഎൽഎയായ ദേശ്പാണ്ഡെയുടെ വാക്കുകള്‍ ഒരിക്കലും അംഗീകരിക്കാന്‍ കഴിയാത്തതും അപമാനകരവുമാണെന്ന് പത്രപ്രവര്‍ത്തക യൂണിയന്‍ പ്രതികരിച്ചു.