നെന്മാറ ഇരട്ടകൊലക്കേസ് പ്രതി ചെന്താമരക്കായുള്ള ഇന്നത്തെ തിരച്ചില്‍ അവസാനിപ്പിച്ചു. നാളെ രാവിലെ തിരച്ചില്‍ പുനരാരംഭിക്കും. പ്രതി പോത്തുണ്ടിയിലെ മാട്ടായി മലയിലേക്ക് കടന്നതായുള്ള സംശയത്തെ തുടര്‍ന്ന് രാത്രിയിലും പൊലീസും നാട്ടുകാരും തിരച്ചില്‍ നടത്തിയിരുന്നു. ചെന്താമരയെ പ്രദേശത്ത് കണ്ടതായി നാട്ടുകാര്‍ പറഞ്ഞിരുന്നു. പിന്നീട് പൊലീസ് ഉദ്യോഗസ്ഥനും പ്രതിയെ കണ്ടതായി സ്ഥിരീകരിച്ചു.
പിന്നീട് ചെന്താമരയുടെ രൂപസാദൃശ്യമുള്ളയാളെ പ്രദേശത്തെ സിസിടിവിയില്‍ കണ്ടത്തിയിരുന്നു.
2019ല്‍ കൊലപാതകം നടത്തിയ ശേഷവും ചെന്താമര ഒളിവില്‍ കഴിഞ്ഞത് കാട്ടിലായിരുന്നു. പിന്നീട് ഇയാളുടെ തറവാട്ടിലേക്ക് വന്നപ്പോഴാണ് പിടിയിലായത്. കൂമ്പാറയിലെ ക്വാറിയില്‍ ഒരു വര്‍ഷത്തോളം സുരക്ഷാ ജീവനക്കാരനായി ചെന്താമര ജോലി ചെയ്തിരുന്നു. അന്ന് കൂടെ ജോലി ചെയ്ത മണികണ്ഠന് ചെന്താമര തന്റെ ഫോണ്‍ കൈമാറിയിരുന്നു. ഇതിന്റെ സിഗ്‌നല്‍ ലഭിച്ചതിനെ തുടര്‍ന്ന് പൊലീസ് ഇവിടെ പരിശോധനക്ക് നടത്തിയിരുന്നു. താന്‍ ഒരാളെ കൊന്നെന്നും രണ്ടുപേരെ കൂടി കൊല്ലാനുണ്ടെന്നും ചെന്താമര പറഞ്ഞതായി മണികണ്ഠന് വെളിപ്പെടുത്തിയിരുന്നു.