പത്തനംതിട്ട:കുന്നന്താനം സാമൂഹ്യ ആരോഗ്യ കേന്ദ്രത്തില് തോക്കുമായി രോഗിയുടെ അതിക്രമം. ചികിത്സ വൈകിയാല് വെടിവച്ച് കൊല്ലുമെന്ന് ജീവനക്കാരെ ഭീഷണിപ്പെടുത്തി.
കുന്നന്താനം സ്വദേശി ലിനു തോമസ് (38) ആണ് എയര്ഗണ്ണുമായി എത്തി ആശുപത്രി ജീവനക്കാര്ക്കും രോഗികള്ക്കും നേരെ തോക്കുചൂണ്ടി ഭീകരാന്തരീക്ഷം സൃഷ്ടിച്ചത്.കുന്നന്താനം സാമൂഹ്യ ആരോഗ്യ കേന്ദ്രത്തില് രാവിലെയാണ് സംഭവം.ലാബില് എത്തിയ ലിനു തോക്ക് എടുത്ത് മേശമേല് വച്ച ശേഷം ജീവനക്കാര്ക്ക് നേരെ തോക്ക് ചൂണ്ടി. നേഴ്സുമാരുടെ മുറിയിലേക്ക് ചെന്ന ഇയാള് ജീവനക്കാര്ക്ക് നേരെ തോക്കുചൂണ്ടി.
മെഡിക്കല് പ്രാക്റ്റീസിന് എത്തിയ വിദ്യാര്ഥികളും മറ്റ് ജീവനക്കാരും രോഗികളും തോക്ക് കണ്ട് പരിഭ്രാന്തരായി പുറത്തേക്ക് ഓടി. മെഡിക്കല് ഓഫീസര് എത്തിയതോടെ ലിനു വാഹനത്തില് കയറി സ്ഥലം വിട്ടു.
ആശുപത്രി അധികൃതര് അറിയിച്ച പ്രകാരം പൊലീസ് നടത്തിയ അന്വേഷണത്തില് ഉച്ചയോടെ പ്രതി പിടിയിലായി. ഇയാളുടെ കൈയില്നിന്നും എയര്ഗണ്ണും സ്റ്റെതസ്കോപ്പും പിടികൂടി. താന് ഡോക്ടറാണെന്നും സാമൂഹ്യ ആരോഗ്യ കേന്ദ്രത്തില് വരാമെന്നും പൊലീസ് പിടിയിലായപ്പോള് ഇയാള് അവകാശപ്പെട്ടു. പരസ്പര വിരുദ്ധമായ കാര്യങ്ങളാണ് ഇയാള് പറഞ്ഞത്.
എയര്ഗണ്ണാണെങ്കില് പോലും ആയുധവുമായി സര്ക്കാര് ആശുപത്രിയില് എത്തുകയും ജീവനക്കാരെ ഭീഷണിപ്പെടുത്തുകയും ചെയ്ത സാഹചര്യത്തില് ആയുധ നിയമ പ്രകാരം ഇയാള്ക്കെതിരെ കേസെടുക്കുമെന്ന് പൊലീസ് അറിയിച്ചു.